ԲՀԿ-ն կմասնակցի՞ սահմանադրական բարեփոխումներին

Հայաստան այցից հետո, որի ժամանակ, հիշեցնենք, քաղաքական ուժերի կողմից բավական կոշտ գնահատականներ հնչեցին, Եվրոպայի խորհրդի խորհրդարանական վեհաժողովի (ԵԽԽՎ) Մոնիտորինգի հանձնաժողովի Հայաստանի հարցով համազեկուցողներ Աքսել Ֆիշերը և Ալան Միլը հայտարարություն են տարածել:

Դրանում կարևորել են, որ «սահմանադրական բարեփոխումների հիմնական նպատակները պետք է լինեն քաղաքական բազմակարծության ամրապնդումը, Ազգային ժողովի առաջ կառավարության հաշվետվողականության բարձրացումը և քաղաքական համակարգի նկատմամբ հասարակության վստահությունը»:

Մինչդեռ հստակ է, որ ներկայում սահմանադրական բարեփոխումների շուրջ միասնական տեսակետ չկա, և այս փաստը ևս չի շրջանցվել համազեկուցողների հայտարարության մեջ:

Հայտարարության հեղինակները շեշտել են նոր Սահմանադրությամբ մարդու իրավունքների պաշտպանության մեխանիզմների և դատական համակարգի անկախության ամրապնդման կարևորությունը՝ նշելով, որ այս նպատակների իրականացումը չպետք է մնա քաղաքական համակարգի փոփոխության վերաբերյալ բանավեճի ստվերում: Ըստ մամուլի՝ նույն այս հարցերը քննարկվել են նաև խորհրդարանական ուժերի հետ փակ դռների հետևում անցկացված հանդիպումների ընթացքում:

Իսկ թե ինչ արդյունք կունենան հանդիպումներն ու այս հայտարարությունը, թերևս պարզ կլինի մոտ ապագայում, երբ ԲՀԿ-ն կներկայացնի սահմանադրական բարեփոխումների շուրջ գուցե արդեն նորացված մոտեցումները կամ առաջարկությունները, ինչպես դա արել են ՕԵԿ-ն ու ՀՅԴ-ն: