Բռունցքով հարվածել է կնոջ դեմքին եւ հափշտակել հեռախոսն ու փողը. Գործը ՀՔԾ-ում է

Քաղաքացի Քրիստինե Գ.-ն ՀՀ ոստիկանության Շենգավիթի բաժնում հաղորդում է տվել այն մասին, որ 2015 թվականի հունվարի 11-ին Արտակ Գ.-ի հետ տաքսի ավտոմեքենայով ուղեւորվելիս է եղել Երեւանի Բագրատունյաց եւ Արտաշատի խճուղու խաչմերուկ: Տաքսի ավտոմեքենայի հեռանալուց հետո, Արտակ Գ.-ն պահանջել է իրենից իր մոտ եղած գումարը եւ մերժում ստանալով՝ բռունցքով հարվածներ է հասցրել դեմքին, այնուհետեւ ձեռքից բացահայտ հափշտակել է իր «Ալկատել» տեսակի բջջային հեռախոսը: Դրանից հետո Արտակ Գ.-ն ձեռքը մտցրել է իր գրպանը եւ կրկին բացահայտ հափշտակել 10 հազ. ՀՀ դրամ եւ հեռացել:

Դեպքի առթիվ ՀՀ քննչական կոմիտեի Շենգավիթ վարչական շրջանի քննչական բաժնում ՀՀ քրեական օրենսգրքի 176-րդ հոդվածի 2-րդ մասի 4-րդ կետով հարուցվել է քրեական գործ եւ շուրջ 7 ամիս կատարվել նախաքննություն:

Արտակ Գ.-ն նախաքննական մարմնին հայտնել է, որ դեպքի օրը ինքը գտնվել է Հայաստանի Հանրապետության սահմաններից դուրս, հետեւաբար չէր կարող կատարել իրեն մեղսագրվող հանցագործությունը:

Հետագայում գործի փաստական հանգամանքներով պայմանավորված՝ լրիվ, օբյեկտիվ եւ բազմակողմանի քննությունը երաշխավորելու անհրաժեշտությունից ելնելով՝ քրեական գործը քննության է ուղարկվել ՀՀ հատուկ քննչական ծառայություն:

Նախաքննությունը շարունակվում է: