ԲՈՒԺՍԱՍԱՐԿՈՂ ԱՆՁՆԱԿԱԶՄԻ ԲԱՑԹՈՂՈՒՄԸ ՀԻՎԱՆԴԻՆ ՀԱՍՑՐԵԼ Է ՄԱՀՎԱՆ

«Ստեփանավանի ԲԿ» ՓԲ ընկերությունում բժիշկների մանագիտական անփույթ վերաբերմունքի պատճառով մահացել է Լոռու մարզի Նորաշեն գյուղի բնակիչ Սամվել Էլոյանը: Նման եզրակացության են հանգել փորձագետները` կատարված փորձաքննության արդյունքում:
Դեպքը տեղի է ունեցել դեռեւս 2013 թվականին, հիվանդանոցում Սամվել Էլոյանի շարունակվող արյունահոսության և պահպանողական բուժման ոչ արդյունավետ լինելու պայմաններում բժիշկները չեն կատարել վիրահատական բուժում` արյունահոսության դադարեցման համար, որն անզգուշությամբ 04.01.2013թ. ժամը 15.35-ի սահմաններում առաջացրել է բուժվող հիվանդ Սամվել Էլոյանը մահը: Դիակի դատաբժշկական փորձաքննության եզրակացության համաձայն, Սամվել Էլոյանի մահվան պատճառը ստամոքսի փոքր կորության շրջանի խրոնիկական խոցային հիվանդության, խոցային արտաքին արյունահոսության, աղիների լուսանցքում ազատ արյան առկայության, ներքին օրգանների սակավարյունության հետևանքով առաջացած հեմոռագիկ շոկն է եղել:

Կրկնակի հանձնաժողովային դատաբժշկական փորձաքննության եզրակացության համաձայն, «Ստեփանավանի ԲԿ» ՓԲ ընկերության աշխատակիցների կողմից թույլ են տրվել բացթողումներ, այն է՝ Ս.Էլոյանի նկատմամբ ձեռնարկված կոնսերվատիվ բուժմիջոցառումները բավարար և համարժեք ծավալով չեն կատարվել, 04.01.2013թ` ժամը 03:30-ի սահմաններում Սամվել Էլոյանի մոտ դիտված կրկնակի արյունահոսության և նկարագրված ծայրահեղ ծանր վիճակի պայմաններում, երբ կատարված ԷԳԴՍ հետազոտմամբ հայտնաբերվել և ախտարոշվել էր արյունահոսության աղբյուրը, անհրաժեշտ էր ոչ թե հրավիրել և շուրջ 6 ժամ սպասել «Վանաձորի ԲԿ» ՓԲ ընկերության էնդոսկոպիստ մասնագետին, այլ պետք է անհապաղ միջոցներ ձեռնարկվեր անեսթեզիոլոգ-ռեանիմատոլոգ մասնագետ հրավիրելու համար՝ կյանքի ցուցումով շտապ վիրահատական բուժման իրականացման նպատակով:

Նոնա  Ադամյան