Ճակատագրական սխալ հայ-ադրբեջանական սահմանին

Lragir.am-ը գրում է .
«Շփման գծում բռնության աճը և ռազմական հռետորաբանությունը ԱՄՆ կառավարության համար մտահոգվելու լուրջ առիթ է: Ես իրատեսական եմ համարում մեկ սխալի հետևանքով իրավիճակի լարվածության ուժեղացումը: Այդ պատճառով է, որ Մինսկի խմբի համանախագահները կոչ են արել երկու կողմերին ձեռնարկել քայլեր, որոնք կնպաստեն շփման գծում բռնության մակարդակի նվազմանը, ինչպես նաև գործի դնել իրադրությունը մոնիթորինգի ենթարկող մեխանիզմներ», հայտարարել է Հայաստանում Միացյալ Նահանգների դեսպան Ռիչարդ Միլզը:

Դրանից մեկ օր առաջ ԱՄՆ-ի ազգային հետախուզության տնօրեն Ջեյմս Կլեպերը տարեկան զեկույց է հրապարակել, որում նշվում է ղարաբաղյան հակամարտության գոտում իրավիճակի սրման հավանականության մասին: Որպես պատճառ նա նշել է, որ Ադրբեջանը չի հրաժարվում Լեռնային Ղարաբաղի հանդեպ պահանջներից, իսկ Հայաստանը՝ իր վերահսկողության տակ գտնվող տարածքներից:

ԱՄՆ-ն առաջնահերթություն է համարում լարվածության թուլացումը ղարաբաղյան հակամարտության գոտում եւ առաջարկում է որոշակի միջոցառումներ, մասնավորապես, իրավիճակի դիտարկում եւ հետաքննության մեխանիզմներ:

Վաղը Մյունխենում Անվտանգության միջազգային համաժողովի շրջանակում Հայաստանի արտաքին գործերի նախարար Էդվարդ Նալբանդյանը կհանդիպի Մինսկի խմբի համանախագահներին, որոնց հետ, հավանաբար, կքննարկի այդ մեխանիզմները: Ադրբեջանի արտգործնախարար Էլմար Մամեդյարովը հայտարարել է, որ համանախագահ երկրները կողմնակալ են ու աջակցում են Հայաստանին, այդ պատճառով հանդիպելու եւ բանակցելու իմաստ չկա:

Մանրամասն ՝ սկզբնաղբյուրում: