Չապացուցված մեղավորությունը հավասարազոր է ապացուցված անմեղության. Վճռաբեկ դատարան

Փաստինֆոն գրում է.Առաջին ատյանի դատարանը թմրամիջոցի ապօրինի շրջանառութան գործով երկու ամբաստանյալի նկատմամբ կայացրել էր մեղադրական դատավճիռ: Ընդ որում` նրանցից մեկի մասով, ով մեղադրվում էր առանց իրացնելու նպատակի թմրամիջոցներ ձեռք բերելու մեջ, դատարանն ընդհանրապես գտել էր, որ պատիժը պայմանականորեն չկիրառելու ինստիտուտի տարածումն անթույլատրելի է:

Վերաքննիչ քրեական դատարանն անփոփոխ էր թողել դատավճիռը, իսկ Վճռաբեկ դատարանը՝ բեկանել ու փոփոխել ստորադաս դատարանների դատական ակտերը՝ արդարացնելով ամբաստանյալներից մեկին ու մյուսի նկատմամբ նշանակելով պայմանական պատիժ:

Այսպես, Վճռաբեկ դատարանը բեկանել և փոփոխել է Արարատ Ավագյանի վերաբերյալ ՀՀ քրեական օրենսգրքի 266-րդ հոդվածի 1-ին մասով՝ իրացնելու նպատակով թմրամիջոցների ապօրինի շրջանառությունը և Վահան Սահակյանի վերաբերյալ ՀՀ քրեական օրենսգրքի 268-րդ հոդվածի 1-ին մասով՝ առանց իրացնելու նպատակի թմրամիջոցների ապօրինի շրջանառությունը, Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի՝ 2014 ականի մարտի 25-ի դատավճիռը և ՀՀ վերաքննիչ քրեական դատարանի՝ 2014 թվականի հուլիսի 8-ի որոշումը: Բարձրագույն դատական ատյանը, այսպիսով, բավարարել է Ա.Ավագյանի պաշտպան Կ.Քամալյանի և ամբաստանյալ Վ.Սահակյանի պաշտպան Ա.Մկրտչյանի վճռաբեկ բողոքները:

Արդյունքում՝ Արարատ Ավագյանը, Վճռաբեկ դատարանի որոշմամբ, ՀՀ քրեական օրենսգրքի 266-րդ հոդվածի 1-ին մասով առաջադրված մեղադրանքում արդարացվել է և նրա նկատմամբ քրեական հետապնդումը դադարեցվել` կատարված հանցագործությանը նրա մասնակցությունն ապացուցված չլինելու պատճառաբանությամբ: Արարատ Ավագյանի նկատմամբ որպես խափանման միջոց ընտրված կալանքը վերացվել է, և նա անհապաղ ազատվել է կալանքից:

Իսկ Վահան Սահակյանի նկատմամբ ՀՀ քրեական օրենսգրքի 268-րդ հոդվածի 1-ին մասով պատիժ է նշանակվել կալանք՝ 2 ամիս ժամկետով՝ 1 տարի ժամկետով փորձաշրջանի սահմանմամբ նշանակված պատիժը պայմանականորեն չի կիրառվի: Վահան Սահակյանի նկատմամբ ընտրված խափանման միջոցը՝ ստորագրություն չհեռանալու մասին, վերացվել է:

մանրամասները` սկզբնաղբյուրում