Չծառայեցնեք զինվորի արյունը ձեր անձնական շահերին (բողոքի ցույց Գառնիում)

Պայքարողները բերում են ևս մեկ փաստարկ, նրանց խոսքերով  ծրագիրը նպաստում է կոնկրետ մի մարդու հողատարածքների ոռոգումը ապահովելուն, խոսքը վերաբերվում է վարչապետ Հովիկ Աբրահամյանին: 

Մինչ այս օրերին բոլորի ուշադրությունն ուղղված է ղարաբաղա-ադրբեջանական սահմանին տեղի ունեցող իրադարձություններին, Գառնու կիրճում տեխնիկա է հայտնվել, կարծես ջրընդունիչ խողովակաշարը կառուցելու պատրաստություն են տեսնում, որի դեմ Գառնու գյուղացիներն արդեն տևական ժամանակ է պայքարում են:

Մեզ հայտնեցին, որ մինչ մայրաքաղաքում ապրիլի 9-ին՝ շաբաթ օրը, բողոքի ցույցեր են իրականացրել Արցախի սահմաններում սկսած ռազմական գործողությունների համար, Գառնիի գյուղացիները ոտքի են կանգնել ընդդեմ «Քաղցրաշենի ինքնահոս ոռոգման համակարգ» ծրագրի իրականացմանը: «Չծառայեցնեք հայ զինվորի արյունը Ձեր անձնական շահերին», «Պատերազմական իրավիճակից օգտվող սադրիչ իշխանավորներ», «Ազատություն ազատ գետին», «Փրկենք մեր գետը, մեր բնությունը, մեր պատիվը» գրությամբ պաստառներով գառնեցիները շաբաթ օրը Գառնի-Գեղարդ պետական ճանապարհն են փակել: Մեզ ահազանգած քաղաքացին պատմեց, որ գառնեցիները 2 ժամից ավելի բողոքի ցույց են իրականացրել: 

Hraparak.am-ը փորձեց պարզաբանումներ ստանալ Գառնու գյուղապետ Աշոտ Վարդանյանից, ով պատմեց, որ այդ օրը եղել է գառնեցիների հետ: Մեր այն հարցին ճի՞շտ են տեղեկությունները, որ Գառնու կիրճում, Ազատ գետի մոտ արդեն տեխնիկա են բերել և աշխատանքներ են սկսել, Աշոտ Վարդանյանը պատասխանեց. «Շինարարություն միանշանակ չեն անում, մենք ճանապարհի կեսը շաբաթ օրը մտանք ձոր, ճանապարհի կեսն անցանք, տղաներին հարցրեցինք, այնտեղ տեխնիկա չկար, բայց իրենք ասում էին կա: Եվ գնացին ասացին, որ չանեն մինչև հանգստանան մարդիկ»: Մեր զանգից հետո սակայն համացանցում նաև տեսանյութերի հանդիպեցինք, որտեղ երևում է հստակ, որ ինչ-ինչ շինարարական աշխատանքներ են սկսել:

Նշենք նաև, որ վերջին ժամանակներս «Համաշխարհային բանկը» պասիվ դիրքորոշում էր ցուցաբերում այս հարցում, կարծես շարժ չկար: Մենք տեղեկացել էինք, որ նրանք ընդամենը սպասում են կառավարության որոշմանը, որն էլ երևի հենց այս օրերին է թույլտվություն տվել սկսել աշխատանքները:

Հիշեցնենք, որ «Համաշխարհային բանկ»-ի վարկավորմամբ ծրագիրը նախատեսում է Գառնու կիրճում գտնվող Ազատ գետում տեղադրել ջրընդունիչ խողովակաշար, որը 980 լ/վրկ քանակությամբ ջուր պետք է հասցնի Արարատի մարզ: Ծրագիրը հանրային քննարկման ներկայացնելիս՝ գառնեցիները նշել էին, թե Ազատ գետում ջրի մակարդակը շարունակում է նվազել, և գետն ամբողջովին կջրազրկվի: Պայքարողները բերում են ևս մեկ փաստարկ, նրանց խոսքերով  ծրագիրը նպաստում է կոնկրետ մի մարդու հողատարածքների ոռոգումը ապահովելուն, խոսքը վերաբերվում է վարչապետ Հովիկ Աբրահամյանին: