Դանակահարություն Մալաթիայում՝ մտերիմ ընկերոջ կնոջը սեռական հարաբերություն ունենալու առաջարկի համար

Վերաքննիչ քրեական դատարանի վարույթում է Միքայել Հ.-ի գործով բերված վերաքննիչ բողոքի քննությունը:

Գործը քննվել է Մալաթիա-Սեբաստիա վարչական շրջանի ընդհանուր իրավասության դատարանում Կարեն Ֆարխոյանի նախագահությամբ:

39-ամյա Միքայելին մեղադրանք էր առաջադրվել տուժողի առողջությանը դիտավորությամբ ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:

Դեպքը տեղի է ունեցել 2009 թվականին: Միքայելը դեպքից հետո Հայաստանից հեռացել է:

Նրան հայտնաբերել են Մոսկվայում և առել են կալանքի տակ: Մոսկովյան մեկուսարանում Միքայելն անազատության մեջ է եղել 2013 թվականի ապրիլի 6-ից մինչև 2014 թվականի մարտի 20-ը: Այնուհետև՝ 2015 թվականի մայիսի 12-ին Միքայելը կալանքի տակ է առնվել Հայաստանում և անազատության մեջ է մինչ օրս:

Միքայելն ու կինը փաստական ամուսնական հարաբերությունների մեջ են, համատեղ կյանքի ընթացքում՝ 2003 և 2007 թվականներին ունեցել են երկու երեխա՝ տղա և աղջիկ:

Երեխաները Միքայելի խնամքի տակ են եղել, բայց նրանց հայրությունը Միքայելը ճանաչել է ընդհանուր իրավասության դատարանի կողմից այս գործով դատական ակտ կայացնելուց հետո:

Ըստ դատական ակտի՝ Միքայելն իմացել է, որ իր ընկեր Արտավազդ Ք.-ն սիրահետել է իր կնոջը, մինչև անգամ նրան սեռական հարաբերություն ունենալու առաջարկ է արել…

Միքայելը, դատական ակտի համաձայն, 2008 թվականի աշնանից փորձել է հանդիպել Արտավազդի հետ, նրանից պարզաբանում ստանալ, սակայն Արտավազդը անընդհատ խուսափել է Միքայելի հետ հանդիպումից:

2009 թվականի հունվարի 2-ին Միքայելը նորից զանգել է Արտավազդին, վերջինս պատասխանել է զանգին, Միքայելը նրա հասցեին հայհոյանք է տվել ու առաջարկել է հանդիպել:

Միքայելի հետ հեռախոսով խոսել է նաև այս գործով տուժող Տիգրան Հ.-ն: Վերջինիս հետ խոսելիս նույնպես Միքայելը հայհոյանք է տվել, լսել է պատասխան հայհոյանք: Պայմանավորվել են հանդիպել Մալաթիայի տոնավաճառի մոտ ու պարզաբանում կատարել:

Արտավազդը, Տիգրանը և նրանց երեք ընկերները Րաֆֆու փողոցում գտնվող «Սամ» հացատան մոտ հանդիպել են միայնակ եկած Միքայելին:

Հայհոյանքներ տալու հարցի շուրջ վիճաբանություն է սկսվել Միքայելի ու Տիգրանի միջև:

Այդ ժամանակ Միքայելը, ըստ դատական ակտի, սուր կտրող-ծակող առարկայով հարվածել է Տիգրանի կրծքավանդակի ձախ կեսին ու նրա առողջությանը պատճառել է ծանր վնաս՝ կրծքավանդակի ձախ կեսի կողմնային մակերեսի միջին անութափոսային գծով 8-րդ միջկողային տարածության կտրած-ծակած թափանցող վերք, ձախակողմյան պնևմոթորաքս:

մանրամասները՝1-in.am-ում: