Եկեք մեղքը չբարդենք ուրիշների վրա

Անցակետն աշխատում է քմահաճույքով եւ դա նորություն չէ

Վերին Լարսի անցակետը խմդրահարույց անցակետ է, քանի որ դա աբխազների անցակետն է և աբխազները Ռուսասատնի հետ ունեն պրոբլեմներ: Fnews.am-ի հետ զրույցում ասաց տնտեսագետ Զոյա Թադևոսյանը` անդրադառնալով Վերին Լարսի անցակետի փակման պատճառներին ու հետևանքերին: Տնտեսագետը նկատում է` անցակետն աշխատում է քմհաճույքով և դա նորություն չէ. «Ռուսաստանի տրամադրությունը եթե տեղը չի` կարող է քնից արթնանալ և ասել Լարսը փակ է. իրեն էդպես է պետք և որևէ մեկը չունի որևէ վարչական մեխանիզմ, որպեսզի նրա վրա ազդի: Դա վաղուց է հայտնի, որ առիթներ շատ են օգտագործել ու շատ անգամներ են փակել Լարսը»,-նկատում է Զոյա Թադևոսյանը` չբացառելով սակայն, որ այս անգամ, այնուամենայնիվ, Լարսի փակման պատճառը եղանակային պայմաններն են:

Ամեն դեպքում նրա գնահատմամբ` դա լուրջ տնտեսական հետևանքեր կարող է ունենալ Հայաստանի համար: Հայաստանի հիմնական բեռնափոխադրումները մեքենաներով կատարվում է հենց այս անցակետով: Հատկապես հիմա, երբ գյուղատնտեսական շրջան է, Լարսի փակվելը կարող է լուրջ վնասներ պատճառել գյուղատնտեսներին: Հարցին, թե արդյո՞ք Հայաստանի տնտեսությանը լուրջ վնասներ չեն հասցվի նաև ռուս-թուրքական հաշտեցման արդյունքում, հաշվի առնելով, որ թուրքական պտուղ-բանջարեղենի ներկրման արգելքը կվերանա և հայկական ապրանքը ուժեղ մրցակից կունենա, Զոյա Թադևոսյանը պատասխանեց, որ թուրքական ապրանքները ոչ միայն այլ երկրներում, այլև Հայաստանում են տեղական ապրանքերի մրցակից հանդիսանում:

Նա հիշեցրեց մոտ մեկ ամիս առաջ Հայաստան ներկրված նորահաս կարտոֆիլի և պոմիդորի դեպքը, երբ գյուղացիները լուրջ խնդիրներ ունեցան, քանի որ ստիպված էին մրցակցել Թուրքիայից ներկրվող նույնանուն ապրանքների հետ: «Շատ հաճախ, հաշվի չառնելով տեղական արտադրողների շահերը, թուրքական ապրանքները ներկրում են Հայաստան և բավականին լուրջ վնաս հասցնում մեր տնտեսվարողներին: Եկեք մեղքը ուրիշների մեջ չփնտրենք` ասելով, թե ռուս-թուրքական մերձեցումը կազդի Հայաստանի տնտեսության վրա...»,- նշեց տնտեսագետը:

Նրա դիտարկմամբ` յուրաքանչյուր երկրի կառավարություն ինքը պետք է որոշի, թե ինչպես է պաշտպանում իր արդտադրողներին և ներդնի այնպիսի մեխամիզմեր, որպեսզի նախ դրանք չհակասեն առևտրի համաշխարհային կազմակերպության կողմից սահմանված նորմերին, ինչպես նաև ելնեն երկրի տնտեսավարողների շահերից: «Այդպիսի մեխանիզմեր շատ կան, պարզապես ցանկություն չկա դրանք կիրառելու, քանի որ ներկրողները շուկայում գերիշխող դիրք ունեցողներ են, որոնց միշտ էլ տրվում են արտոնություններ իշխանությունների կողմից` առանց հաշվի առնելու մեր ներքին շուկայում աշխատող տնտեսվարողների շահերը»,- նկատում է Զոյա Թադևոսյանը:

Հիշեցնենք, որ հունիսի 23-ին` ժամը 16.40-ի սահմաններում, Վրաստանի ՆԳՆ ԱԻ դեպարտամենտից տեղեկություն էր ստացվել, որ Վերին Լարսի անցակետից մոտ 2 կմ հեռավորության վրա (Վրաստանի տարածքում), Թերեք գետի վարարման հետևանքով ավտոճանապարհի 500-600 մ հատված ամբողջովին փլուզվել է, և այդ պատճառով փակվել է ՌԴ-Վրաստան սահմանային անցակետը: