ԵՊԲՀ հնդիկ ուսանողի մահվան պատճառը կպարզի դատաբժշկական փորձաքննությունը

Երևանի պետական բժշկական համալասարանի ուսանող 23 ամյա Ռաջա Կաննադասանը իր ֆեյսբուքյան էջում վերջին անգամ գրառում է կատարել, ավելի ճիշտ սեպտեմբերի 12-ին վերատարածել է իր ցանցային ընկերուհու գրառումը: Հնդկերեն երկտողը փող չունենալու և ճշմարտության մասին է: Գրառումից գրեթե 1 ու կես ամիս անց հնդիկ ուսանողը մահացավ առեղծվածային հանգամանքներում: Հնդկական մամուլի հրապարակումների համաձայն` տղան ինքնասպան է եղել ուսման վարձը վճարելու համար փող չունենալու պատճառով: Նրա հայրը դատի է տվել հնդկական մի բանկի, որը հրաժարվել էր ուսանողական վարկ տրամադրել:

Բժշկական համալսարանի երրորդ կուրսի ուսանողը սեպտեմբերի սկզբին սկսել է իրեն տարօրինակ պահել: Հանրակացարանի նույն սենյակում նրա հետ բնակվող Դամոդարան Րամուսամին տեսել է, թե ինչպես է Ռաջան մտել խոհանոց ու կոտրել ամեն ինչ: Այնուհետև Ռաջան դադարել է խոսել ընկերների հետ: Հաջորդ օրը` սեպտեմբերի 16-ին, Ռաջային տեղափոխել են Նորքի հոգեբուժարան:

Հոգեբուժարանում հնդիկ ուսանողին ընդունած գլխավոր բժիշկ Արմեն Մելիք-Փաշայանը Shabat.am-ի հետ զրույցում ասաց, որ սթրեսը չէր կարող լինել հոգեկան խանգարման պատճառ, բայց կարող էր դրդել, որ այն ի հայտ գա: Ռաջան հոգեբուժարան տեղափոխվելուց հետո հայտարարել է, թե ինքն Աստված է և փորձել է պատուհանից դուրս նետվել: Ուսանողին հանգստացրել են ու պահել հսկողության տակ: Նորքի հոգեբուժարանի բաժանմունքի վարիչ Ջեմա Դանիելյանը նշում է, որ Ռաջան բավական արագ է ապաքինվել` ազատվել է ինքնասպանության մտքերից: Նրան պարբերաբար այցելել են ուսանող ընկերներն ու Հնդկաստանի դեսպանատան ներկայացուցիչները: Նույնիսկ պատրաստվում էին դուրս գրել:

Ռաջային սկսել է խնամել հերթապահ բժիշկ Իրինա Ստեփանյանը: Սիստեմա միացնելուց հետո, երբ թքարտադրությունը չի դադարել, զանգել է շտապ օգնություն` կասկածելով, որ հիվանդը սուր ալերգիկ ռեակցիա ունի: Հիվանդանոց տեղափոխելուց մի քանի օր անց Ռաջան մահացավ անհայտ նյութի թունավորումից: Նորքի հոգեբուժարանի անձնակազմը պնդում է, որ իրենց հիվանդների մոտ որևէ նյութ չի եղել: Դեղերը, որոնք ընդունել է Ռաջան, չէին կարող այրել ու այտուցել Ռաջայի բերանի խոռոչն ու կոկորդը: Հնդիկ ուսանողի մահվան պատճառը կպարզի դատաբժշկական փորձաքննությունը:

«Բոլոր ծախսերը վերցրել ենք մեզ վրա, անհրաժեշտ բոլոր միջոցառումներն արվել են»,- ասաց ԵՊԲՀ մամուլի պատասխանատու Ալեքսանդրա Հարությունյանը Shabat.am -ի հետ զրույցում:

Թե ինչու է համալսարանի ռեկտորը նման որոշում կայացրել, մամուլի ծառայությունից դժվարացան պատասխանել: