Երեւանում կնկարազարդվի եւս 280 բակային տարածք

Երեւանի քաղաքապետարանում տեղի ունեցած աշխատանքային հերթական խորհրդակցության ժամանակ քաղաքապետ Տարոն Մարգարյանը անդրադառնալով քաղաքապետարանում եւ վարչական շրջաններում գործող թեժ գծերի հեռախոսահամարների աշխատանքին՝ հանձնարարել է շարունակել հսկողությունը բարձրացվող հարցերին տրվող պատասխանների եւ լուծումների նկատմամբ: Հանձնարարվել է նաեւ քայլեր ձեռնարկել հնարավոր տարբեր միջոցներով բնակչությանը թեժ գծերի հեռախոսահամարների մասին լրացուցիչ իրազեկելու ուղղությամբ:

Խորհրդակցությանը հանրակրթության վարչության պետը զեկուցել է, որ սոցիալապես անապահով ընտանիքների երեխաների հանգստի կազմակերպման ծրագրով առաջին հերթափոխով մարզաառողջարանային ճամբարներում հանգստի է մեկնել երեւանաբնակ 425 երեխա: Քաղաքապետը պատասխանատուներին եւ վարչական շրջանների ղեկավարներին հանձնարարել է ինչպես նախորդ տարի, այս տարի եւս անձամբ այցելել ճամբարներ եւ ծանոթանալ երեխաների առօրյայի կազմակերպմանը:

Հաշվի առնելով, որ ամառային հանգստի շրջանում բնակիչները բակային տարածքներում իրենց ժամանցն անցկացնում են մինչեւ ուշ երեկո, հանձնարարվել է գույքագրել արտաքին լուսավորության ցանցում առկա թերությունները եւ այրված լապմերը փոխարինել նորերով: Վարչական շրջանների բակային տարածքներում շարունակվում են նաեւ նկարազարդումներն ու գունազարդումները: Երեւանի գլխավոր դիզայները զեկուցել է, որ ընդհանուր առմամբ այս տարի կնկարազարդվի 280 բակային տարածք: Հանձնարարվել է ակտիվացնել այս, ինչպես նաեւ մայրաքաղաքում առկա մետաղյա կառուցվածքների ներկման ուղղությամբ աշխատանքները: