Երևանում «հալալ» ընկերոջ դստեր նկատմամբ սիրո պատճառով ընկերը սպանել է ընկերոջը

Ավան և Նոր Նորք վարչական շրջանների ընդհանուր իրավասության դատարանում Սամվել Ուզունյանի նախագահությամբ շարունակվեց Աքսել Ներսիսյանի գործի դատական քննությունը:

38-ամյա Աքսել Ներսիսյանը մեղադրվում է ՀՀ քրեական օրենսգրքի 112 հոդվածի 2-րդ մասի 14-րդ կետով՝ տուժողի առողջությանը դիտավորությամբ ծանր վնաս հասցնելու համար, ինչի հետևանքով տուժողը մահացել է:

Ըստ մեղադրանքի՝ 2014 թվականի փետրվարի 8-ին, ժամը 20-ն անց 30-ից 21-ն ընկած ժամանակահատվածում Նոր Նորքի 5-րդ զանգվածի շենքերից մեկի դիմաց «անձնական փոխհարաբերությունների պարզաբանման շուրջ Աքսել Ներսիսյանը վիճաբանել է Վարդան Մանուկյանի հետ, վիճաբանության ընթացքում իր հետ նախապես վերցրած դանակով երկու հարված է հասցրել Մանուկյանին»՝ դիտավորությամբ նրա առողջությանը պատճառելով ծանր վնաս: Ստացած վնասվածքներից Վարդան Մանուկյանը հաջորդ օրը՝ փետրվարի 9-ին մահացել է:

Տուժող Վարդանը անհույս ու անպատասխան սիրահարված է եղել իր ընկերոջ 21-ամյա դստերը: Աղջիկը չի սիրել նրան, համարել է, որ իրենից 16 տարով մեծ տղամարդու հետ ամուսնանալ չի կարող:

Դեպքի օրը Վարդանը եղել է իր ընկերոջ ու սիրած աղջկա տանը, տարօրինակ վարքագիծ է դրսևորել՝ ըստ վկաների, մեկ արտասվել, մեկ գոռգոռացել է, փորձել է իր զգացմունքների մասին խոսել, բայց նրան չեն լսել, տանից ցանկացել են դուրս հանել: Մի քանի անգամ Վարդանը դուրս է եկել, հետո վերադարձել: Երրորդ անգամ նրա հետ դուրս են եկել տանտերը՝ աղջկա հայրը, և վերջինիս ընկեր Աքսելը, ով աղջկա հորը տուն է ուղարկել, ինքը «ճանապարհել է» Վարդանին, ու այդ «ճանապարհելը» ավարտվել է դանակահարությամբ, որի արդյունքում Վարդան Մանուկյանը հիվանդանոցում մահացել է:

Դատարանը հետազոտեց գործում առկա գրավոր ապացույցները:Դեպքը կատարվել է Նորքի զանգվածի Գալշոյան փողոցում:

1-in.am