«Ֆինանսական բուրգի» գործով նոր բացահայտումներ և մանրամասներ

1in.am-ը գրում է.«Ֆինանսական բուրգի» գործով Կենտրոն և Նորք-Մարաշ վարչական շրջանների ընդհանուր իրավասության դատարանում ամբաստանյալ Արթուր Անդրեասյանը ցուցմունք տվեց: Նա իրեն մեղավոր չի ճանաչում յոթ տուժողներից խարդախության եղանակով առանձնապես խոշոր չափերի գույք հափշտակելու համար:

Ամբաստանյալը նշեց, որ իր մեղադրանքի մեջ նշված ու լրատվամիջոցներում կրկնվող այն միտքը, թե ինքը բուքմեյքերական գրասենյակներում խոշոր չափերի գումարներ է տանուլ տվել ու դրա պատճառով է սնանկացել, իրականությանը չի համապատասխանում:

Ինքը բուքմեյքերական գրասենյակ էր աշխատեցնում, այնտեղ խոշոր գումարներով խաղադրույքներ կատարողներ կային,ովքեր խաղադրույքներն իր միջոցով են արել ու տանուլ են տվել:
Ցուցմունքներ տալու ժամանակ ինքն ասել է, թե ինքն է կատարել խաղադրույքները, որ մարդկանց ավելորդ քաշքշուկների մեջ չգցի: Բացի դրանից, խաղադրույք կատարելը հանցագործություն չէ: Իր պարագայում դա այնպես է շեշտվում, ասես հանցագործության մասին է խոսքը:

Արթուր Անդրեասյանն ասաց, թե ինքն իր պարտատերերին չի խաբել, կեղծ խոստումներ չի տվել՝ նրանց վստահությունը շահելու համար: «Բոլորը, ովքեր ինձ գումարներ են տվել, գիտեին, որ այդ գումարները հետ են գալու, դրա երաշխիքը ավազահանքն էր… Նրանք եկամուտ էին ստանում իրենց տված գումարների դիմաց…
Ես չէի կարող իմանալ, որ այդ մարդիկ գումարներ ունեն: Իրենք են իրենց գումարներն ինձ առաջարկել՝ տեսնելով, որ գործ եմ անում, եկամուտ ունեմ: Երբ իրենց գումար է պետք եղել, ես ոչ մի րոպե չեմ ուշացրել… Միայն երբ Արտակ Գալստյանը ավազահանքը վերցրեց ինձանից, ես այլևս չկարողացա իմ պարտավորությունները կատարել… Եթե հանքը շարունակեի աշխատեցնել, ահավոր մեծ գումարների եկամուտների մասին էր խոսքը, ես իմ պարտավորությունները կկատարեի, իմ ընտանիքն էլ կպահեի…»:
Խոսքը Կոտայքի մարզի Ջրաբեր համայնքի մոտ եղած ավազահանքի մասին է, որի փայատերերը, ըստ Արթուր Անդրեասյանի, սկզբում եղել են ինքը և իր երեխայի քավոր Մուշեղը:
Հիսուն-հիսուն բաժնեմասեր են ունեցել: Բայց սկզբնական ներդրումներն ինքն է արել, դրա համար, երբ հանքն աշխատեցնեին, ինքը պիտի վերցներ իր ներդրած 350 հազար դոլարը, նոր եկամուտը պիտի բաժանեին հիսուն-հիսուն սկզբունքով:

մանրամասնեչը՝ սկզբնաղբյուրում