(Ֆոտո) Սերժ Սարգսյան. Մեր ժողովուրդը եւ մեր մարզիկները արժանի են օլիմպիական ոսկե մեդալի

Նախագահ Սերժ Սարգսյանն այսօր երեկոյան սպորտի ոլորտի պատասխանատուների հետ մասնակցել է Հանրապետության մարզաշխարհի ներկայացուցիչների պարգևատրման հանդիսավոր արարողությանը:

Ավանդական դարձած նախատոնական այդ հանդիպմանը Նախագահը շնորհավորել է մարզաշխարհի ներկայացուցիչներին՝ Ամանորի և Սուրբ Ծննդյան տոների առթիվ, մաղթել առողջություն, նորանոր հաջողություններ ու ձեռքբերումներ սպորտի բնագավառում և անձնական կյանքում: Սերժ Սարգսյանը շնորհավորել է նաև պատվավոր կոչումների արժանացած մարզիկներին:

Խոսելով սպորտային իրադարձություններով և հաջողություններով լի անցնող 2015թ. մասին՝ Հանրապետության Նախագահը կարևորել է տարին նաև որպես նախաօլիմպիական և մաղթել, որ 2016թ. Ռիո Դե Ժանեյրոյում կայանալիք խաղերին Հանրապետության մարզիկների մեջ լինեն ոսկե մեդալի արժանացողներ՝ մեր ժողովրդին պարգևելով հպարտության պահեր:

«Ամենամյա այս միջոցառումն արդեն ավանդական է դարձել: Ես շատ մեծ հաճույքով եմ մասնակցում այս միջոցառմանը: Շրջապատված եմ ուժեղ մարդկանցով եւ ուժեղների կողքին մեծ ուժ եմ առնում:

Սպորտը կարեւորում ենք երկու տեսակետից: Մասսայական սպորտը, առողջ ապրելակերպը բոլոր ժողովուրդների համար շատ կարեւոր է: Շնորհավորել 2015 թվականի ձեռքբերումերը՝ նկատի ունեմ այն 138 մեդալները, որոնք մեր փառապանծ մարզիկները նվաճել են Հայաստանի համար:

Սպորտի կարեւորության երկրորդ տեսանկյունը հենց սա է՝ այն, որ այդ մեդալների շնորհիվ մեր մարզիկները ճանաչելի են դարձնում մեր երկիրը: Փոքր երկրների համար այս նվաճումները շատ կարեւոր են, այդպես եւ մեզ համար այս նվաճումները նշանակալից են: Ցանկանում եմ, որպեսզի հաջորդ տարի մեր մարզիկներից որեւէ մեկը կամ երկուսը արժանանան օլիմպիական ոսկե մեալի: Մեր ժողովուրդը եւ մեր մարզիկները դրան արժանի են: Կարծում եմ, դրան արդեն երկար ենք սպասում, չնայած ՀԱՕԿ-ը եւ սպորտի նախարարությունը մեծ ջանքեր են գործադրում՝ մեր ժողովրդի երազանքը իրականություն դարձնելու համար: Ես վստահ եմ, որ ՀԱՕԿ նախագահ Գագիկ Ծառոււկյանն ամեն ինչ կանի, ոպեսզի վերջապես մեր բոլորիս երազանքն իրականություն դառնա: Ես չեմ ասում, թե Գագիկ Ծառուկյանն է գնալու այնտեղ մեդալը նվաճի, այլ, որ Գագիկ Ծառուկյանը մեծ աշխատանք ունի կատարելու, ոգեւորելու եւ քաջալերելու հայ մարզիկներին, օգնելու, որպեսզի մենք ունենանք օլիմպիական չեմպիոն Ռիո-2016-ի ամառային Օլիմպիական խաղերոմ:

Սիրելի մարզիկներ, 2016 թվականին թող իրականան ձեր երազաքները: Ուզում եմ արդար պայքարում հասնեք հաջողությունների: Դուք մեր ժողովրդի ոգեւորող ուժն եք»:

Հիշեցնենք, որ Հայաստանի մարզական լրագրողների ֆեդերացիայի հարցման արդյունքում տարվա լավագույն մարզիկ է ճանաչվել հունահռոմեական ըմբշամարտի աշխարհի կրկնակի չեմպիոն Արթուր Ալեքսանյանը:

Հարցմանը մասնակցել են 34 մարզական լրագրողներ: Երկրորդ տեղում է հայտնվել Բաքվում կայացած Եվրոպական մարզական խաղերի հունահռոմեական ոճի ըմբշամարտի մրցաշարում արծաթե մեդալ նվաճած Միհրան Հարությունյան, իսկ մարմնամարզության աշխարհի առաջնության բրոնզե մեդալակիր Հարություն Մերդինյանը եզրափակել է լավագույն եռյակը:

Ֆուտբոլի Հայաստանի հավաքականի կիսապաշտպան Հենրիխ Մխիթարյանը, որը վերջին շրջանում հրաշալի խաղ է ցուցադրում Դորտմունդի «Բորուսիայի» կազմում եւ արժանանում եվրոպական մամուլի բարձր գնահատականին, տեղ չի գտել նույնիսկ լավագույն տասնյակում:

Տարվա լավագույն թիմ է ճանաչվել շախմատի տղամարդկանց Հայաստանի հավաքականը:

Հիշեցնենք, որ այս տարի Արթուր Ալեքսանյանը պաշտպանել էր աշխարհի չեմպիոնի տիտղոսը:

Հայաստանի 10 լավագույն մարզիկները 2015-ին

1. Արթուր Ալեքսանյան՝ հունահռոմեական ոճի ըմբշամարտ - 339 միավոր

2. Միհրան Հարությունյան՝ հունահռոմեական ոճի ըմբշամարտ - 267

3. Հարություն Մերդինյան՝ սպորտային մարմնամարզություն - 265

4. Տիգրան Մարտիրոսյան՝ ծանրամարտ - 231

5. Արթուր Թովմասյան՝ սպորտային մարմնամարզություն - 113

6. Արման Երեմյան՝ թաեքվոնդո - 107

7. Տիգրան Կիրակոսյան՝ սամբո - 106

8. Արամ Ավագյան՝ բռնցքամարտ - 101

9. Անդրանիկ Կարապետյան՝ ծանրամարտ - 99

10. Սմբատ Մարգարյան՝ ծանրամարտ - 95

Մարզական լրագրողները հարցաթերթիկներում նշել են եւս 3 մարզիկների անուններ. Արթուր Դավթյան (սպորտային մարմնամարզություն, 81 միավոր), Լեւոն Արոնյան (շախմատ, 35 միավոր) եւ Հենրիխ Մխիթարյան (ֆուտբոլ, 31 միավոր):