Ֆրանսիայում հայերի հետ համագործակցության արդյունքում բացվել է Համազգային դպրոց

Հոկտեմբերի 25-ին ՀՀ սփյուռքի նախարար Հրանուշ Հակոբյանն ընդունեց Ֆրանսիայի Մարսել քաղաքի քաղաքապետ-սենատոր Ժան Կլոդ Գոդենի գլխավորած պատվիրակությանը, որի կազմում էին՝ Մարսելի քաղաքապետի առաջին տեղակալ Ռոլան Բլումը, Մարսելի քաղաքապետի տեղակալ Դիդիե Պարակյանը, Մարսելի 13 և 14-րդ թաղամասերի թաղապետ Կարո Հովսեփյանը, Եվրախորհրդարանի պատգամավոր Դոմինիկ Վլաստոն: Հանդիպմանը ներկա է եղել նաև ՀՀ-ում Ֆրանսիայի արտակարգ և լիազոր դեսպան Անրի Ռենոն: Նախարարը ողջունել է ներկաներին և իր գոհունակությունն է հայտնել հայ-ֆրանսիական հարաբերությունների, Ֆրանսիայում հայ համայնքի աշխատանքների, ինչպես նաև Ֆրանսիայում ապրող հայերի՝ Ֆրանսիայի հասարակական կյանքին ակտիվ մասնակցություն ցուցաբերելու համար: Քննարկվել են երկկողմ համագործակցության, ինչպես նաև Հայոց ցեղասպանության ճանաչման և հետևանքների վերացման վերաբերյալ օրենքների նախագծերին ուղղված աշխատանքներին առնչվող հարցեր: Ժան Կլոդ Գոդենը շնորհակալություն հայտնեց ընդունելության համար՝ նշելով, որ Մարսելում ապրում են 80 հազար հայեր, ովքեր համախմբված են և աշխատասեր: Նրանք ամեն ինչ անում են Հայաստանի և Ֆրանսիայի զարգացման և առաջընթացի, ինչպես նաև ջերմ բարեկամության համար: Քաղաքապետն ընդգծել է, որ հայերը կարևոր դերակատարում ունեն Ֆրանսիայի տնտեսության մեջ: Հայերի հետ համագործակցության արդյունքում բացվել է Համազգային դպրոցը, որը դրական ընդունելություն է գտել ֆրանսիական միջավայրում: Ներկայումս դպրոցն ունի 320 աշակերտ, որոնք բոլորն էլ ունեն բարձր առաջադիմություն: Հանդիպման ավարտին Մարսելի քաղաքապետ Ժան Կլոդ Գոդենը ՀՀ սփյուռքի նախարարին պարգևատրեց Մարսելի շքանշանով: