Գլխավոր դատախազը հերքել է, որ հանդիպել է Ռազմիկ Աբրահամյանին.lragir.am

Գլխավոր դատախազ Արթուր Դավթյանը հանդիպել է դատախազության շենքի մոտ այսօր բողոքի ակցիա իրականացրած ծնողների հետ, ովքեր կորցրել են իրենց երեխաներին: Հիշեցնենք, որ ծնողները պահանջում են, որպեսզի ապօրինի որդեգրումների գործով մեղավորները կալանավորվեն: Մասնավորապես, նրանք պահանջում են կալանավորել գործով մեղադրյալներից հանրապետության նախկին գլխավոր մանկաբարձ Ռազմիկ Աբրահամյանին:

«Դատախազն ասաց, որ իրենց նպատակը գործերի բացահայտումն է, բողոքարկել են Ռազմիկ Աբրահամյանի կալանավորման որոշումը և սպասում են արդյունքներին: Համացանցում ասում էին, որ Արթուր Դավթյանը Ռազմիկ Աբրահամյանի հետ պարբերաբար հանդիպել է ռեստորանում: Ես այդ հարցն ուղղեցի Արթուր Դավթյանին, նա հերքեց՝ ասելով, որ մատուցողը շփոթել է, իր փոխարեն եղել է Ռազմիկ Աբրահամյանի փաստաբանը: Դատախազն ասաց, որ երբ ընդհանուր քննության արդյունքները լինեն, դա թասիբի հարց է իր համար, կպարզաբանի, որ ինքը չի հանդիպել Ռազմիկ Աբրահամյանի հետ»,- լրագրողներին ասաց հանդիպմանը մասնակցած ծնողներից Հայկուհի Խաչատրյանը:

Ծնողները նաև բարձրացրել են հարցը՝ ովքե՞ր են «վերևներում» խոչընդոտ հանդիսանում այս գործի բացահայտման համար: «Հարցրեցի՝ գուցե ձեր աշխատակից Գրիգորի Պողոսյա՞նն է, նա ասաց, որ Պողոսյանն անմիջական կապ չունի այս գործի քննության հետ»,- հավելեց Հայկուհի Խաչատրյանը: Նշենք, որ Գրիգորի Պողոսյանը բժիշկ Անդրանիկ Պողոսյանի որդին է: Անդրանիկ Պողոսյանը նախկինում աշխատել է Ռազմիկ Աբրահամյանի հետ, և ծնողներից մեկի բողոքը հենց Անդրանիկ Պողոսյանի դեմ է:

Ծնողներն ասացին, որ այսօր Երևանի ընդահնուր իրավասության դատարանի շենքի մոտ կշարունակեն իրենց ակցիան՝ կրկին պահանջելով կալանավորել Ռազմիկ Աբրահամյանին:

lragir.am