Գյուղատնտեսության ոլորտը, ըստ նախարարի, արդեն 4.8% տնտեսական աճ է գրացել

Փաստինֆոն գրում է. Տնտեսական համատարած անկման պայմաններում ՀՀ գյուղատնտեսության նախարար Սերգո Կարապետյանը վստահեցնում է, որ իր ղեկավարած ոլորտում տնտեսական աճն արդեն հասել է 4.8%-ի, և մինչև տարեվերջ դեռ էլի կաճի:

«Մթերումների առումով ևս խնդիր չենք ունենալու, պտուղ բանջարեղեններ, խաղող և այլն մթերողները պատրաստ են ընդունելու և մշակելու, որոշակի խնդիրներ կան արտահանումների հետ, որոնք առաջիկայում, համոզված եմ, կկարգավորվեն։ Այս տարի ծիրանի մեծածավալ արտահանում է իրականացվելու»,- այսօր կառավարության նիստում հայտարարեց նախարարը:

Սերգո Կարապետյանը նշեց, որ այս տարի նույնիսկ ջրամբարներում ջրի քանակն է գերազանցում նախորդ տարիների ցուցանիշը:

Իսկ ինչ վերաբերում է, օրինակ, կարկտահարության հասցրած վնասներին, նախարարը նշեց, որ դրանց ցուցանիշները դեռ չեն հաշվարկել:

«Այս տարի հիմնականում վնասվել են բազմամյա տնկիները՝ 1400 հա-ի չափով, այսինքն պտղատու ծառեր՝ հիմնականում ծիրանենի, ինչպես նաև խաղողի այգիներ՝ մինչև 350 հա»,- ասաց նա։

Իսկ կարկուտից պաշտպանվելու ավանդական եղանակը՝ հակակարկտային կայանները, որոնց վրա Հայաստանում վերջին տարիներին մեծ գումարներ են ծախսվում, ըստ նախարարի, այլևս հնացած են: Հիմա պետք է անցնել այլ մեթոդի:

«Այս միջոցն ամբողջ աշխարհում այլևս չի օգտագործվում, օգտագործվում են ցանցային եղանակով կարկտահարությունից պաշտպանության միջոցը։ Մեր երկրում արդեն գործընթացն սկսված է։ Մենք մի քանի տարածքներում, հատկապես Արարատյան դաշտում, ունենք տեղադրված նման տեխնոլոգիա։ Ուզում եմ ասել, որ մեր նպատակն է՝ երկրում իրագործել ցանցայինի արտադրությունը, որն արդեն ձեռնարկված է։ Հաստատ համոզված եմ, որ եկող տարվա սկզբին մենք կունենանք այդ ցանցերի արտադրությունը մեր երկրում»,- ասաց նախարարը: