ՀԱԿ-ի դիրքորոշումը Փոստանջյանի օրինագծի վերաբերյալ անփոփոխ է

ՀԱԿ խմբակցության ղեկավար Լևոն Զուրաբյանը հայտարարեց, որ ՀԱԿ-ի դիրքորոշումը «Ժառանգության» պատգամավոր Զարուհի Փոստանջյանի նախագծի վերաբերյալ, անփոփոխ է:

«Մեր խմբակցությունը ԼՂՀ ինքնորոշման հետևողական կողմնակիցն է եղել ու մնում, միևնույն ժամանակ անկախության ճանաչումը համարում ենք վաղաժամ: 1992թ. ի վեր Մինսկի խմբի միջնորդությամբ տարվող բանակցությունները մենք համարում ենք հիմնահարցի կարգավորման վերջնական տարբերակ: Եթե մենք ճանաչենք ԼՂՀ անկախության ճանաչումը, այդ դեպքում ՀՀ-ն միակողմանիորեն դուրս է գալիս բանակցային գործընթացներից և բանակցությունների տապալման առիթ տալիս»,- ընդգծեց Զուրաբյանը:

Ըստ նրա՝ նման միակողմանի քայլը ոչ թե կնպաստի ԼՂՀ միջազգային ճանաչմանը, այլ միջազգային մեկուսացման կտանի ու ռազմական գործողությունների վերսկսման: Նա նշեց, որ չի մասնակցելու քվեարկությանը:

ԱԺ փոխնախագահ Էդուարդ Շարմազանովն իր արտահերթ ելույթում նշեց, որ ՀՀ-ն ԼՂՀ անվտանգության երաշխավորն է. «Եվ քիչ դրական աշխատանք մենք չենք արել միջազգային ամբիոններում, որ միջազգային գործընկերները հասկանան, որ ԼՂՀ ինքնորոշումն այլընտրանք չունի, քան ճանաչումը: Եվ որ աշխարհում անխուսափելի է ազգերի ինքնորոշման իրավունքը: Մենք պետք է միասնական լինենք ԼՂՀ, ՀՀ, սփյուռքահայ հանրությունները, որ հասնենք ԼՂՀ անկախության ճանաչման: Նման կարծիք ունի նաև ԼՂՀ ԱԺ-ն: Իրենց համար նախընտրելի է, որ նման օրինագծերը լիարժեք, այլ ոչ թե մասնակի կողմ ճանաչվեն: ԼՂՀ անկախության ճանաչումն անկյունաքարային հարցերից մեկն է, եւ այդ պատճառով եկեք հատվածային հաջողություններ չգրանցենք»: