ՀԱԿ-ը չի մասնակցի Ծառուկյանի խորհրդաժողովին

«Բարգավաճ Հայաստան» կուսակցության առաջնորդ Գագիկ Ծառուկյանի նախաձեռնությամբ հունվարի 20-ին հրավիրված խորհրդաժողովին մասնակցելու են քաղաքական, հասարակական ուժեր, նախաձեռնություններ, անհատներ: Shabat.am-ի թղթակցի հետ զրույցում ասաց ԲՀԿ նախագահի մամլո խոսնակ Իվետա Տոնոյանը:

Նա նշեց, որ այս պահի դրությամբ մեկ տասնյակից ավելի ոչ իշխանական ուժեր են մասնակցելու, մոտ 70 հասարակական կազմակերպություն, բազմաթիվ վերլուծաբաններ, տնտեսագետներ, քաղաքագետներ: Այսպես, խորհրդարանական ուժերից Ծառուկյանի խորհրդաժողովին մասնակցելու է միայն «Ժառանգությունը», իսկ ոչ խորհրդարանական ուժերից՝ «Առաքելությունը», «Ազգային համաձայնությունը», «Համերաշխությունը», «Ազգային անվտանգությունը», «Ժողովրդական կուսակցությունը» եւ այլն:

Չեն մասնակցելու ՀՀԿ-ն, ՀՅԴ-ն, ՕԵԿ-ը, ՀԱԿ-ը: Մամուլի խոսնակը չգիտի՝ նրանց չեն հրավիրել, թե չեն գալիս: Գործընկեր ՀԱԿ-ի չմասնակցելու մեջ էլ խնդիր չեն տեսնում, ԲՀԿ-ի եւ ՀԱԿ-ի համագործակցությունը ընթանում է տարբեր հարթակներում՝ երկկողմ, եռյակի ձեւաչափ: Թե ինչպես է կազմակերպվել քաղաքական ուժերի մասնակցության հարցը, Իվետա Տոնոյանն ասաց, որ գործում էր կազմկոմիտե, որը զբաղվում էր կազմակերպչական աշխատանքներով, համակարգում էր մասնակցելու ցանկություն հայտնած ուժերի հարցը, գործել է 2 տարբերակն էլ՝ թե ԲՀԿ-ն է հրավիրել, թե ուժերն են ցանկություն հայտնել:

Խորհրդաժողովին կմասնակցեն նաեւ ազատամարտիկների մի շարք միություններ, այդ թվում «Երդվյալ ազատամարտիկների միությունը» (Ռուբեն Գեւորգյանի գլխավորած) եւ «Ազատամարտիկների դաշինքը» (Ռուստամ Գասպարյանի գլխավորած):

Ինչ վերաբերում է խորհրդաժողովի մասնակիցների քանակին, Իվետա Տոնոյանն ասաց, որ քանի որ հայտերը շատ են, ընթացակարգ է սահմանվել, թե տվյալ ուժից քանի հոգի կարող է մասնակցել, որպեսզի ֆիզիկական անհնարինության խնդրի առաջ չկանգնեն:

Նախատեսվում է խորհրդաժողովը սկսել ժամը 12.00-ին, գրանցումը կլինի ավելի վաղ, նախատեսված է երեք նիստ՝ ամեն մեկը 1,5 ժամ տեւողությամբ, ելույթ կունենա նաեւ Գագիկ Ծառուկյանը, կլինի հարցուպատասխան, վերջում էլ կամփոփվեն աշխատանքները: Ի դեպ, նախնական տեղեկություններով՝ նույն օրը նույն ժամին էլ նախատեսված է ԱԺ երեք հանձնաժողովների խորհրդակցությունը Գյումրիի դեպքերով: Թե ինչպես կվարվեն ԲՀԿ-ականները, առայժմ հայտնի չէ: Ծառուկյանի խոսնակն ասաց, որ նման հարակից նախաձեռնությունների հարց չի քննարկվել: