Հակառակ պարագայում` ՕԵԿ-ը` ամեն գնով կպայքարի, որ ներկայացված նախագիծը չընդունվի

Hartak.am-ը հարց է  ուղել ԱԺ ՕԵ խմբակցության ղեկավար Հեղինե Բիշարյանին:

Տիկին Բիշարյան, ինչպիսին է լինելու «Օրինաց երկիր» կուսակցության վերջնական դիրքորոշումը Սահմանադրական բարեփոխումների վերաբերյալ, կուսակցությունը ձևավորելո՞ւ է առանձին ճակատ, միանալո՞ւ է «Ոչ»-ի ճակատին, կամ պայքարելո՞ւ է բարեփոխումների համար:

-Ի սկզբանե ևս մեկ անգամ ընդգծեմ, որ «Օրինաց երկիր» կուսակցությունը դեմ է այս տեսքով ներկայացված Սահմանադրության նախագծին և այն ենթակա է խորքային փոփոխությունների: Եվ սրա մասին ոչ մեկ անգամ ենք հրապարակավ հայտարարել:

Սակայն այս գործընթացի հենց սկզբից ՕԵԿ-ն իր քաղաքական խորհրդի որոշմամբ հայտարարեց, որ Սահմանադրական փոփոխությունները քաղաքական և հանրային կարևոր նշանակություն ունեն Հայաստանի Հանրապետության համար, հետևաբար չենք կարող պարզապես դիտորդ լինել մեր երկրի և ժողովրդի համար կարևորագույն նշանակություն ունեցող այս գործընթացում:

Հաջորդիվ` կուսակցությունը Սահմանադրական փոփոխությունների մասնագիտական հանձնաժողովին ներկայացրեց 5 կոնցեպտուալ առաջարկություններ: Պետք է ընդգծեմ, որ բոլոր այն առաջարկությունները, որոնք կուսակցությունն ուղարկել էր հանձնաժողով, չեն փոխվել, ավելին` վերջին նախագծի հրապարակումից հետո, դրանք մի քանի անգամ ավելացել են:

Այժմ թերևս ամենակարևորի մասին. Սահմանադրական բարեփոխումների նախագիծն ուղարկված է Ազգային ժողով վերջնական քննարկման և ընդունման համար: Վստահ եմ` լիելու է բուռն քննարկում, որին «Օրինաց երկիր» խմբակցությունը ակտիվորեն մասնակցելու է: Մենք նաև Ազգային ժողովում հետևողականորեն առաջ ենք մղելու մեր մոտեցումները, մեր առարկություններն ու առաջարկությունները:

Սակայն, ուզում եմ մի չափազանց կարևոր դիտարկում անել: Եթե ելնենք այն թեզից, որ իշխանությունները փորձելու են հանրաքվեի դնել և ամեն գնով անցկացնել Սահմանադրության այս նախագիծը, ապա մենք էլ ամեն գնով պետք է փորձենք հնարավորինս բարելավել այն` ելնելով այն նկատառումից, որ քննարկումներին չմասնակցելով ներկայացված նախագիծն ավելի լավը, ավելի ընդունելի հաստատ չի դառնա: Ավելին` իսկ հակառակ պարագայում` ՕԵԿ-ը` որպես քաղաքական ուժ ամեն գնով կպայքարի, որ ներկայացված նախագիծը չընդունվի:

Այդուհանդերձ քննարկումների ավարտից հետո, երբ նախագիծը կդրվի վերջնական քվեարկության, ելնելով վերը նշածիցս //թե որքանով են ընդունվել ՕԵԿ-ի առաջարկությունները//, «Օրինաց երկիր» կուսակցությունը կարտահայտի իր վերջնական քաղաքական դիրքորոշումը և, բնականաբար, կորոշի, թե որ ճակատում, ինչ եղանակներով, ինչպես կշարունակի իր քաղաքական պայքարը: Մի բան կարող եմ հաստատ ասել` եթե մեր առաջարկությունները չընդունվեն, մենք լինելու ենք այս գործընթացի դեմ պայքարի առաջին ճակատում: