Համոզելու թեմա չկա այստեղ, կան խնդիրներ, որոնք պետք է լուծում ստանան

Բարձրագույն որակավորման կոմիտեի նախագահ Սմբատ Գոգյանը, պատասխանելով այն տեղեկություններին, ըստ որոնց՝ ինքը փոշմանել է, որ աշխատանքից ազատման դիմում է գրել, ֆեյսբուքի իր էջում գրառում էր կատարել, որում նշել է, որ այդ տեղեկությունները չեն համապատասխանում իրականությանը։

«Մինչև ինձ աշխատանքից ազատելու հրամանի վավերացումն իմ պարտքն ու պարտականությունն եմ համարում գնալ աշխատանքի ու հնարավորինս բարեխղճորեն կատարել այն։ Խնդրում եմ այդ փաստը չխառնել փոշմանելու հետ։

Ես հստակ նշել եմ իմ հրաժարականի պատճառն ու, ցավոք, դիմումս գրելուն հաջորդող 27 օրերի ընթացքում բարձրացրածս հարցերի պատասխանը չեմ ստացել։ Ինձ ծաղրելու, վախեցնելու փորձերից բացի՝ այլ զարգացում չեմ տեսել»,- գրել էր Գորյանը։

«Հրապարակի» հետ զրույցում նա խորհուրդ տվեց հարցը, թե երբ են ստորագրելու իր դիմումը, ուղղել վարչապետի աշխատակազմին։ Գոգյանին հարցրինք նաև, թե այս ընթացքում կառավարությունից իր հետ ինչ-որ կապ հաստատե՞լ են, փորձե՞լ են համոզել, որ դիմումը հետ վերցնի․

«Համոզելը․․․ համոզելու թեմա չկա այստեղ, կան խնդիրներ, որոնք պետք է լուծում ստանան, խոսքը իմ բարձրացրած խնդիրների մասին է»,- պատասխանեց Գոգյանը։

Նշենք, որ ըստ մեր ունեցած տեղեկությունների՝ իշխանությունը ԲՈԿ նախագահի պաշտոնի համար չունի համապատասխան կադր, ուստի ամեն կերպ փորձում են Գոգյանին համոզել, որ հետ վերցնի դիմումը, դրանով էլ պայմանավորված է այն, որ մայիսի 14-ից՝ շուրջ մեկ ամիս, այդ դիմումը չի ստորագրվում։

Հիշեցնենք, որ Գոգյանը աշխատանքից ազատման դիմում գրելուց հետո գրառում էր կատարել՝ նշելով իր այդ որոշման պատճառները․

«ԲՈԿ-ի նախագահի պաշտոնից ազատման որոշումս ունի երեք շերտ․

1․ Կրթության և գիտության բարեփոխման իմ պատկերացումները չեն համընկել նախարարության ռազմավարության հետ և ժամանակի ընթացքում այդ հակասությունները խորացել են։ Չնայած այդ տեսակետերի տարբերության, աշխատել եմ խղճի թելադրանքով։ Համակարգում բարեփոխում անելու համար անհրաժեշտ էին օրենքի կողմից լիազորող նորմեր, որոնք ստանալ այդպես էլ չկարողացա։ Իսկ նախարարի կողմից ԱԺ ամբիոնից նոր օրենքով ԲՈԿ-ը փակելու հայտարարությունից հետո աշխատելը դարձավ անիմաստ։ Իմ գաղափարներն այլևս կյանքի կոչել չեմ կարող։ Գրագողերը սպասում են կառույցի փակվելուն։

2. 2019 թվականի օգոստոսին հարցազրույցներից մեկում ասացի, որ եթե Ռ․ Հայրապետյանը հրաժարականի դիմում չգրեր, ապա ես կգնայի։ Իմ խոսքը կոնկրետ Ռուբենի մասին չէր, այլ երևույթի։ Նրանից հետո նշանակված ռեկտորի ժամանակավոր պաշտոնակատարի դոկտորական աշխատանքում առկա են ակնհայտ թարգմանություններ և արտագրություններ, բայց համապատասխան կապերի և հովանավորչության միջոցով նա առ այսօր զբաղեցնում է իր պաշտոնը։ Իր պաշտոնավարումն արժեքային ընտրություն է՝ իմ և իր միջև։

3. Նշանակումից երեք ամիս անց կնոջս հետ պայմանավորվեցինք, որ եթե նա ասի, որ մեծամտացել կամ հղփացել եմ, ապա նույն օրն աշխատանքից ազատման դիմում կգրեմ։ Նա այդպիսի բան դեռ չի ասել, բայց իր կարծիքով ես սկսել եմ ավելի քիչ ուրախանալ։ Իսկապես, այս աշխատանքն ինձ սկսել է հաճույք չպատճառել, քանի որ հստակ գիտակցում եմ, որ աշխատանքիս արդյունավետությունը կտրուկ ընկել է»,- գրել էր Գոգյանը։

Հետագայում Սմբատ Գոգյանը «Հրապարակի» հետ զրույցում հաստատել էր նաև, որ իր հրաժարականից հետո իր բարձրացրած հարցերի վերաբերյալ փորձել է տղայական զրույց ունենալ ԿԳՄՍ փոխնախարար Գրիշա Թամրազյանը։ Վերջինս էլ չէր հերքել, որ Գոգյանի հետ զրույց ունեցել է, սակայն նշել էր, որ դա տղայական չի եղել։