Հանրապետական կուսակցությունը հրապարակել է ռեյտինգային ցուցակները

Առաքել Մովսիսյան, Միհրան Պողոսյան, Սամվել Ալեքսանյան, Ալիկ Սարգսյան և այլոք: Հայաստանի հանրապետական կուսակցության ռեյտինգային ցուցակներն արդեն պատրաստ են: Փետրվարի 11-ին ՀՀԿ Գերագույն մարմնի նիստից հետո ՀՀԿ մամուլի խոսնակ Էդուարդ Շարմազանովը հրապարակեց տարածքային ցուցակները՝ նշելով, որ համամասնական ցուցակները կհրապարակվեն հաջորդ շաբաթ՝ երեքշաբթի կամ չորեքշաբթի:
13 ցուցակներում ներառված են Ազգային ժողովի պատգամավորներ, ազգային փոքրամասնությունների ներկայացուցիչներ, բժիշկներ, դասախոսներ, նոր դեմքեր և փորձառու դեմքեր:
Թիվ 1 ընտրատարածքում, որում ներառված է Ավանը, Նոր-նորքը և Քանաքե-Զեյթունը, կառաջադրվեն Ազգային ժողովի պատգամավոր Ռոբերտ Սարգսյանը, ԴԱՀԿ նախկին պետ Միհրան Պողոսյանը, Երկրապահ կամավորականներից Ղուկաս Ուլիխանյանը, և այլոք: Այստեղ առաջադրվել է 12 թեկնածու:
Թիվ 2 ընտրատեղամասում Արաբկիր, Աջափնյակ,Դավթաշեն համայնքներում հայտնի դեմքերից առաջադրվել են Արտակ Սարգսյանը, Արման Սահակյանը, Ալբերտ Երիցյանը, Արման Բաբլոյանը, Արթուր Գևորգյանը:
Թիվ 3 ընտրատեղամասում առաջադրվել են Սամվել Ալեքսանյանը, Կորյուն Նահապետյանը, Արայիկ Հովհաննիսյանը: Կենտրոնում էլ Հակոբ Բեգլարյանը, Հարություն Կարապողոսյանը:
Շիրակի մարզում, ըստ Շարմազանովի, առաջադրվել են պատգամավորներ Սուքիաս Ավետիսյանը, Արման Սահակյանը, Մարտուն Գրիգորյանը (նախկինում ԲՀԿ-ական), Մուշեղ Պետոյանը, նախկին մարզպետ Ֆելքիս Ցոլակյանը: Ընդհանուր 13 հոգի:
Տավուշում կառաջադրվեն պատգամավորներ Հակոբ Հակոբյանը, Գրիգոր Ավայանը, Հասմիկ Ամիրյանը, նախկին պատգամավոր Վարդան Պետրոսյանը:
«Գեղարքունիքում կառաջադրվեն մարզպետ Րաֆֆի Գրիգորյանը, Ազգային ժողովի պատգամավորներ Հակոբ Հակոբյանը, Կարեն Բոթոյանը, նախկին պատգամավոր Տիգրան Արզաքանցյանը, Գավառի պետ. Համալսարանի հռեկտոր Ռուզաննա Հակոբյանը, Մարտունու նախկին քաղաքապետ Բագրատ Հարությունյանը, Սևանից Աշոտ Ավետիսյանը, Կոտայքից նախկին բնապահպանության նախարար Արամ Հարությունյանը, մաքսային և հարկային ծառայության արդեն նախկին աշխատող, գեներալ Սամվել Սանամյանը, փոխմարզպետ Համլետ Հայրապետյանը, Արագածոտնուց պատգամավորներ Արագած Ախոյանը, Բազմասեր Առաքելյանը, հայտնի գրոսմաստեր Լիլիթ Մկրտչյանը, պատգամավոր Մնացական Մնացականյանը»,- նշեց ՀՀԿ մամուլի խոսնակը՝ հավելելով, որ Արմավիրից էլ կառաջադրվեն Սեյրան Սարոյանը, Հրանտ Գրիգորյանը, Առաքել Մովսիսյանը, Նահապետ Գևորգյանը և ևս մի քանի թեկնածու:
Վայոց ձորից և Սյունիքի Աշոտ Արսենյանը, Նարինե Առաքելյանը, մարզպետ Վահե Հակոբյանը, Ավետ Սսարգսյանը և այլն:
Ըստ Շարմազանովի՝ Լոռիից ընդգրկված են ԱԺ պատգամավոր Կարեն Կարապետյանը, ՀՀԿ խմբակցության ղեկավար Վահրամ Բաղդասարյանը, ԱԺ պատգամավոր Արկադի Համբարձումյանը, Վալքես գրուպի Ալավերդու պղնձաձուլական կոմբինատի տնօրեն Լուսինե Մեժլումյանը, ռուսական համայնքի ներկայացուցիչ Օլեգ Իգնատցենկոն: Իսկ Արարատից էլ պատգամավոր Արայիկ Գրիգորյանը, ոստիկանության նախկին պետ Ալիկ Սարգսյանը, Հայկ Հովհանիսյան, ներկայիս պատգամավոր Մուրադ Մուրադյանը:

Հատկանշական է, որ ՀՀԿ տարածքային ցուցակներում ընդգրկված չեն Մանվել Գրիգորյանը և Մհեր Սեդրակյանը: ՀՀԿ մամուլի խոսնակը նշեց, որ ցուցակում կան այլ երկրապահ կամավորական միության ներկայացուցիչներ:
«Եվ այդ իմաստով Մանվել Գրիգորյանի սատարումը ՀՀԿ-ին նորություն չէ: Համագործակցությունը ԵԿՄ-ի հետ և անձամբ Մանվել Գրիգորյանի հետ արդյունավետ է և երկարաժամկետ: Իսկ Մհեր Սեդրակյանի հետ կապված որևէ բան չեմ կարող ասել»,- ասաց Շարմազանովը:

civilnet.am