Հայկ Կյուրեղյանի գործով դատական նիստը հետաձգվեց. պատճառը նույնն է

Փաստինֆոն գրում է. 
Երևանի Կենտրոն և Նորք-Մարաշ վարչական շրջանների դատարանի շենքի դիմաց բողոքի ակցիա կատարած Հայկ Կյուրեղյանի գործով այսօրվա դատական նիստը տեղի չունեցավ՝ ամբաստանյալի պաշտպան, դատարանի կողմից պատշաճ ծանուցված Արա Զաքարյանի բացակայության պատճառով:

Նախորդ դատական նիստը ևս հետաձգվել էր՝ պաշտպանի բացակայության պատճառով:

Ամբաստանյալը նշեց, որ ինքը չի կարող բացատրել, թե որն է պաշտպանի բացակայության պատճառը՝ միաժամանակ հավելելով, որ ինքը ցանկություն ունի հրաժարվել իր պաշտպանից:

Դատարանը պարզաբանեց, որ պաշտպանից հրաժարումը պետք է տեղի ունենա պաշտպանի ներկայությամբ, ուստի դատական նիստը չի կարող տեղի ունենալ: Երրորդ անգամ պաշտպանի անհարգելի բացակայության դեպքում դատարանը կանդրադառնա այդ հարցին:

Այսօրվա դատական նիստում ևս ամբաստանյալը դատարանի՝ դատական դահլիճ մուտք գործելու պահին ոտքի չկանգնեց:

Դատարանն ամբաստանյալին պարզաբանեց դատական նիստի կարգի մասին օրենքի դրույթը և այն խախտելու դեպքում՝ դատական սանկցիաները:

Ամբաստանյալը շարունակեց նստած մնալ նաև այն բանից հետո, երբ դատարանը պաշտպանի բացակայության հետ կապված հարց ուղղեց ու պատասխան ստացավ ամբաստանյալից:

Արդյունքում՝ ամբաստանյալը երկու անգամ նախազգուշացվեց: