Հայկական վերածնունդը այսօրվա պայքարի գլխավոր դերակատարներից մեկն էր

Մեր զրուցակիցն է «Հայկական վերածնունդ» հասարակական-քաղաքական միավորման  մաս կազմող «Աշխատավորների շահերի պաշտպանության շարժում» ՀԿ նախագահ Կարեն Թումանյանը

-Պարոն Թումանյան, այսօրվա ՛՛համար 1՛՛  թեման Սարյան փողոցի վրա գտնվող  ՀԾԿՀ շենքի մոտ անցկացված բողոքի ակցիան է: Դուք  այնտեղ էիք և ինչպես մամուլում նշվեց՝ ամենաակտիվներից մեկն էիք: Դուք այնտեղ ներկայացել էիք որպես «Աշխատավորների շահերի պաշտպանության  շարժում» ՀԿ-ի նախագա՞հ, թե՞ հանդես էիք գալիս «Հայկական վերածնունդ»-ի անունից:

-Իհարկե ես այնտեղ էի ՛՛Հայկական վերածննդի՛՛ առաքելության շրջանակներում: Ասեմ, որ օրեր առաջ տեղի ունեցավ այս միավորման հերթական նիստը, որտեղ բացի կառուցվածքային խնդիրներից քննարկվեցին նաև էլեկտրաէներգիայի հետ  կապված հարցերը: Նիստի ընթացքում որոշում կայացվեց, որ «Հայկական վերածնունդ»-ը մինչև վերջ պայքարելու է էլեկրաէներգիայի թանկացման դեմ:

-Պարոն Թումանյան, եթե չեմ սխալվում, անցած տարի ամռանը ևս  պայքարում էիք էլ.էներգիայի թանկացման դեմ: Նույնիսկ ՕԵԿ-ի կողմից կազմակերպված հանրահավաքի ժամանակ ելույթ ունեցաք և ասեցիք, որ այս հարցում սատարելու եք ՕԵԿ-ին: Փաստորեն ստացվում է, որ Դուք այն ժամանակ էլ էիք  Արթուր Բաղդասարյանի կողքին, հիմա էլ. Ինչո՞վ է դա պայմանավորված:

-Շատ անգամ եմ ասել և չեմ զլանում նորից կրկնել. Արթուր Բաղդասարյանն այն եզակի քաղաքական գործիչներից է, ում հետևից, իրոք , պետք է գնալ, քանզի նրա քաղաքական փորձը, խնդիրներին հստակ լուծումներ տալու շնորհքը բազմիցս տվել են իրենց արդյունքները: Այո, Հայկական վերածննդի ստեղծման նախաձեռնությունը Արթուր Բաղդասարյանինն է , և ես չէի կարող նրա կողքին չլինել:   Ամենաթողության և անպատժելիության մթնոլորոտի մեջ հայտնված Հայաստանում միայն վերածննդի գաղափարը կարող  է ստեղծել մի միջավայր , որտեղ հնարավոր է հաղթահարել երկրի առջև ծառացած մարտահրավերները: