ՀՀ քրեական դատավարության նոր օրենսգիրք առաջիկայում չենք ունենա

Ազգային ժողովը կառավարությունից դեռևս չի ստացել ՀՀ քրեական դատավարության նոր օրենսգրքի նախագծի լրամշակված տարբերակը:

Հաշվի առնելով ԱԺ օրակարգի ծանրաբեռնվածությունը, ըստ ամենայնի, այն մինչև տարեվերջ չի ընդունվի, եթե, իհարկե, չլինի քաղաքական որոշում: Այս մասին, ի պատասխան «Փաստինֆո»-ի թղթակցի հարցի, հայտնեց ԱԺ պետական-իրավական հարցերի մշտական հանձնաժողովի նախագահ Հովհաննես Սահակյանը:

Ինչպես ավելի վաղ տեղեկացրել էինք, նախագիծը, որը ԱԺ-ում շրջանառության մեջ է 2012թ. սեպտեմբերից, թեև 2014թ. մայիսի 19-ին ընդգրկվել է նստաշրջանի օրակարգ, սակայն Արդարադատության նախարարության և ԱԺ հանձնաժողովի ներկայացուցիչներից բաղկացած աշխատանքային խմբի կողմից տևական ժամանակ մանրակրկիտ քննարկվել է: Քննարկումների ավարտից հետո այն ուղարկվել է Արդարադատության նախարարություն՝ լրամշակելու նպատակով:

ՀՀ արդարադատության նախարարի մամուլի քարտուղար Ծովինար Խաչատրյանը հոկտեմբերի վերջին հայտնել էր, որ աշխատանքային խումբը ներկայումս ամփոփում է նախագծի վերաբերյալ ԱԺ պատգամավորների ներկայացրած առաջարկությունների քննարկման արդյունքները և 2-3 շաբաթից այն նորից կուղարկվի Ազգային ժողով: