ՀՀԿ-ական «ընդդիմադիրը»

Նոր փոխվարչապետի թեկնածուների՝ մամուլում շրջանառվող անունների թվում է նաև ՀՀ նախագահի աշխատակազմի նախկին ղեկավար, ՀՀԿ-ական Կարեն Կարապետյանի (Տաշիրի Կարեն)անունը, սակայն առանց որևէ հիմնավորման, պարզապես շրջանառվում է: Իսկ հիմնավորում գտնելը դժվար կլինի, նույնիսկ՝ անհնար, քանի որ հատկապես վերջին շրջանում այս գործչից ոչ ոք գլուխ չի հանում: Նա նույնիսկ ընդհատակ է անցել:

Խոսակցություններ էին շրջանառվում, որ դեռ ապրիլին Սերժ Սարգսյանը նրան առաջարկել էր ԱԺ նախագահի պաշտոն ստանձնել, սակայն Կարապետյանը հրաժարվել էր՝ հավանաբար վարչապետ դառնալու առաջարկ ստանալու ակնկալիքներ ունենալով և հուսախաբվելով: Բայց նախագահը կարծես թե այլ կերպ էր մտածում և Կարեն Կարապետյանին նման լուրջ պաշտոնում չէր տեսնում: Վերջիվերջո, Սերժ Սարգսյանը կարող էր հաշվի առնել անցյալի դառը փորձը, օրինակ այն, թե ժամանակին ինչպիսի աշխատակազմի ղեկավար է եղել Կարեն Կարապետյանը:
Այս առիթով մի դեպք հիշեմ՝ 2011թ ինքնակոչ տիեզերագնաց Արթուր Պողոսյանի հայտնվելը հավանաբար բոլորն են հիշում, թե ինչպես նա ներկայացավ որպես Գալիլեյո Գալիլեյի վերածնունդ, ինչպես կեղծ փաստաթղթեր ներկայացնելով՝ ասաց, որ 2016-ին NASA-ն իրենց տիեզերք է ուղարկելու և այլն: Ամենաաբսուրդայինն այն էր, որ նույնիսկ դպրոցի տարրական դասարանների երեխան առաջին իսկ հայացքից կարող էր հասկանալ, որ սա էժանագին խաբեություն է, որ ինքնակոչը պարզապես ձեռք է առնում պետական պաշտոնյաներին: Սակայն նախագահի աշխատակազմի ղեկավարը դա ոչ միայն չհասկացավ, այլ նույնիսկ հանդիպում կազմակերպեց «տիեզերագնացի» հետ՝ դրանով իսկ վկայելով իր «գերինտելեկտուալ» ունակությունների մասին:

Բնական է, ինչպե՞ս կարող էր նման մարդը վարչապետ լինել, ի՞նչ կլիներ երկրի տնտեսության հետ այդ դեպքում…

Բացի այդ, նախագահի աշխատակազմի ղեկավար եղած ժամանակ Կարապետյանն իր բառապաշարով էլ առանձնապես չփայլեց՝ մի անգամ Նաիրիտի բանվորներին անվանելով «համբալ»:
Բայց այդքանից հետո էլ ոչինչ չփոխվեց ու Կարապետյանի ակնկալիքները չարդարացան, ինքն էլ հավանաբար նեղացած մնաց նախագահից, այդ պատճառով էլ ոչ միայն պասիվացավ,այլ աստիճանաբար անցավ ընդհատակ, նույնիսկ սկսեց տարբեր առիթներով քննադատել իշխանություններին: Օրինակ պարտադիր կուտակայինի աղմուկի ժամանակ ի զարմանս բոլորի՝ Կարեն Կարապետյանը դեմ արտահայտվեց այդ օրենքին: Իսկ այս տարվա հունիսի 3-ին տված իր հարցազրույցներից մեկում արդեն բացահայտ քննադատեց Հայաստանի Կառավարության գործունեությունը՝ տարօրինակ կերպով առաջ բերելով արդիական և տեղին հարցադրումներ: Տպավորություն էր, թե խոսողը ընդդիմադիր գործիչ է:
Հերթական աղմկահարույց հարցազրույցը հոկտեմբերի 1-ին էր, երբ Կարապետյանը խոսելով Շրջանառության հարկի օրենքի մասին՝ կրկին քննադատեց Կառավարությանը: Այսպիսով, ստվեր անցած գործիչը ժամանակ առ ժամանակ հարցազրույցների միջոցով «ծիկրակում» է, բայց արդեն «կիսաընդդիմադիր» կամ էլ, կարելի է ասել, «ՀՀԿ-ական ընդդիմադիր» կերպարի մեջ:
Այնպես որ նոր փոխվարչապետացուների ցանկից Կարեն Կարապետյանին հանգիստ խղճով կարող ենք հանել, քանի որ շատերն են տարբեր առիթներով բարձրաձայնում, որ նրա ամբիցիաները ուղղակի խեղդում են...

Արտյոմ   Եդիգարյան