Հիմի ոստիկանը մերն ա՞, թե՞ այնուամենայնիվ հանրապետականինն ա…

«ՀՀ ոստիկանության և ժողովրդի միջև փշալարեր չկան»,-այս նախերգանքով էր նորընտիր վարչապետ Նիկոլ Փաշինյանը սկսել իր հանդիպումը ՀՀ ոստիկանության ղեկավար կազմի և կոլեգիայի անդամների հետ , երբ առաջին անգամ ոստիկանապետի պաշտոնում ներկայացնում էր ժողովրդի՝ ոստիկանապետի թեկնածու Վալերի Օսիպյանին:

Նույն օրը, վարչապետ Փաշինյանը, մասնավորապես ընդգծել էր. «Ըստ էության, ստացվել է այնպես, որ նաև քաղաքական իրադարձությունների բերումով քաղաքացիները, հատկապես ընդդիմադիր տրամադրված քաղաքացիները և ոստիկանությունն երբեմն եղել են գծի տարբեր կողմերում: Ակնկալում եմ, որ մենք այդ գծերը կջնջենք»,- նշել էր վարչապետը, եւ անդրադառնալով ՀՀ ոստիկանության կադրային քաղաքականությանը, հայտարարել.«Կադրային քաղաքականության մեջ պետք է բացառել պատկերավոր ասած կլանային մոտեցումը և ՀՀ ոստիկանության համակարգում ծառայողական առաջխաղացման սկզբունքը պետք է լինի պրոֆեսիոնալիզմը, նվիրվածությունը ծառայությանը, Հայաստանի Հանրապետությանն ու նրա ժողովրդին: Կարծում եմ, բոլորս լավ հասկանում ենք, որ ՀՀ բազմաթիվ քաղաքացիներ ոստիկանությանը շարունակելու են ընկալել որպես մի սուբյեկտ, որը կանգնած է փշալարերի այն կողմում: Մեր և ձեր ամենակարևոր խնդիրն է շատ արագ ՀՀ քաղաքացիներին ի ցույց դնել, որ ոստիկանության և ժողովրդի միջև փշալարեր, վահաններ, հատուկ միջոցներ չկան և ոստիկանությունը ծառայում է Հայաստանի Հանրապետությանն ու նրա ժողովրդին»,- այսպես էր իր խոսքը եզրափակել կառավարության ղեկավարը:

Ամեն բան լավ էր ասված, եւ իսկապես մեծ էին սպասումները, որ գնում ենք ժողովրդավարական Հայաստան կերտելու բաղձալի ճանապարհով: Քանի որ ժողովուրդն իսկապես հավատում էր, որ ի վերջո համակարգային ու գլոբալ փոփոխությունների ականտեսն է լինելու: 

Մարդու և քաղաքացու իրավունքների պահպանության ու պաշտպանության սահմանադրական սկզբունքի կենսագործումը ոստիկանության գործունեությունում, բարեփոխումների այնպիսի բովանդակություն էր ենթադրում, , որն ուղղակիորեն պետք է դրականորեն անդրադառնար հասարակության անդամների մեծամասնության վրա:
Իսկ վերջնարդյունքում, քաղաքացին իրեն առավել անվտանգ և վստահելի կզգար՝ առաջինը հենց ոստիկանության ներկայության պայմաններում:
Սակայն, այն ինչ տեղի ունեցավ օպերայի տարածքում ապամոնտաժման հայտնի գործընթացի ժամանակ. ոչ այլ ինչ էր, եթե ոչ նախկին իշխանությունների օրոք որդեգրած խայտառակ ու անմարդկային գործելաոճ, որի արդյունքում էլ, ունեցանք այն՝ինչ ունեցանք…

Եւ իրականում, մի շարք հարցերի ու կասկածների տեղիք է տալիս նույն սադիստ ոստիկանի այդօրվա ազատ ու անկաշկանդ ռինգ մտնելը, քանի որ ուսադիրներ կրող այդ երեւույթը՝ մինչ օպերայի տարածք հասնելը, գոնե իր անմիջական ղեկավարի կողմից պետք է «ինստրուկտաժ» արված լիներ, թե ուր է գնում, եւ ինչի համար…

Թավշյա Ռեմբոն գոնե պետք է տեղյակ լիներ, որ իր գործառույթների մեջ մտնում է ոչ թե «քաղաքացուն քացու տակ գցելն ու սամասուդ» անելը, այլ այդ նույն քաղաքացու ազատ ու անվտանգ տեղաշարժը ապահովելը…այն նույն քաղաքացու, ով ամիսներ առաջ կոկորդ էր պատռում՝ «ոստիկանին մերը» դարձնելու համար:Որեւէ մեկս դեմ չենք, որ Տարոնների օրոք, աղավաղված մեր մայրաղաքը՝ կրկին վերագտնի իր կորսված դեմքը:

Բայց եւ կողմ էլ չենք, որ հայրենի ոստիկանը, նմանօրինակ ակցիաների ժամանակ՝ իր լկտի ու հոռի բարքերով, հասարակությանը նորից հիշեցնի Երանոսյաններին ու մնացյալ բոլոր ժանդարմներին, ովքեր մարդկանց հոշոտելով, ծեծելով ու ջարդելով, պահպանում էին իրենց պաշտոնները…

Եւ հիմա էլ, շատերը մի պաթոսով մեջբերում են. թե բա տեսա՜՜՜՜ք, փողոցային խուլիգանից չտարբերվող ոստիկանի լիազորությունները դադարեցվել են: Իյա՝իրո՞ք…. բա գինեսի գրքում դա կարելի ա գրանցել.ոնց-որ չե՞ք ուշացնում, տղերք:
Իսկ ավելի լուրջ. պարոնայք գեներալներ, ոստիկանական մեծ ու փոքր այրեր. եթե չեք ուզում որ այստեսակ ոստիկանների ջանքերով պատմությունը կրկնվի ու ժողովուրդը նորից ոտքի կանգնի. ժամ առաջ, պրոֆիլակտիկ աշխատանքներ իրականացրեք հենց ՀՀ ոստիականության համակարգում, ուր կարծես թե թայֆայի ու կլանի «գլուխը չի կտրվել»:

Այլապես ի՞նչ է ստացվում. կամ ոստիկանապետ Օսիպյանին «պրիզնատ» չեն գալիս իր ենթակաները, ու շարունակում են ծեծել ՀՀ քաղաքացիներին, (եթե օրակարգից բացակայում է «վերեւի հրաման» չարիքը ) կամ մնում է կասկածել, որ ինչ-ինչ ձեռքեր այնուամենայնիվ նախկին ռեժիմի օրոք դաստիարակված ոստիկաններին շարունակում են խաղացնել: Ո՞վ իմանա:

Պարո՛ն Օսիպյան, սանձե՛ք Ձեր մեծ ու փոքր ենթականերին. նրանք օր-օրի «բացվում են»:

Ի վերջո մենք խոսում ենք, ոչ թե Կարամելի գործարանի, այլ Հայասատանի Հանրապետության ոստիկանության մասին, ուր ոչ թե նախկինների հետ մերված-սերված ջարդարար ոստիկաններն ու մեծ ու փոքր պագոնավորները պետք է տեղ ունենան համակարգում, այլ իրական պրոֆեսիանալները:

Եւ չստացվի այնպես, որ քաղաքացուն փողոց դուրս հանողը՝ ՈՍՏԻԿԱՆԸ լինի…

Հ.Գ

Հիմի տենց էլ չհասկացանք. պարոն Փաշինյան, ոստիկանը մերն ա՞, թե՞ այնուամենայնիվ Հանրապետականինն ա…

ԳԱՅԱՆԵ   ԶԱՐԳԱՐՅԱՆ