Հովհաննես Թոքմաջյանի օրերը հաշվա՞ծ են

1in.am-ը գրում է. Հայկական պետական ճարտարագիտական համալսարանում (Պոլիտեխնիկ) պայթած վերջին սեքս-սկանդալից հետո երեկ առաջին անգամ տեղի է ունեցել կառավարման խորհրդի նիստ, որին մասնակցել է ԿԳ նախարար Արմեն Աշոտյանը:

«Առաջին լրատվական»-ի տեղեկություններով՝ խորհրդի նիստն անցել է բավական լարված մթնոլորտում: Աշոտյանը շատ խիստ տոնով բուհի ղեկավարությանը զգուշացրել է, որ նոր տարում՝ 2015-ին, Պոլիտեխնիկում մանրակրկիտ ստուգումներ են իրականացվելու, և բոլորը առանձին-առանձին պետք է հաշվետվություններ ներկայացնեն իրենց գործունեության վերաբերյալ:

Աշոտյանը խոսել է նաև բուհը հիմնադրամ դարձնելու կառավարության վերջին որոշման մասին, որից հետո բուհի ռեկտորի պաշտոնն արդեն դառնում է ընտրովի: Նախարարը նկատել է, որ լինելու են շատ արդար և թափանցիկ ընտրություններ՝ ենթատեքստով բուհի ռեկտորի պաշտոնակատար Հովհաննես Թոքմաջյանին ակնարկելով, որ նա ժամանակավոր է: Ներկաները ևս Աշոտյանի խոսքից հասկացել են, որ Թոքմաջյանի օրերը հաշված են Պոլիտեխնիկում:

Հիշեցնենք, որ սկանդալը հիշյալ բուհում պայթեց այն ժամանակ, երբ համացանցում հայտնվեցին Թոքմաջյանի և բուհի աշխատակցուհիներից մեկի ինտիմ խոսակցությունները, որտեղ բավական անպարկեշտ արտահայտություններ էին հնչեցվել նաև Աշոտյանի հասցեին: Ու թեև այս գործով դեռևս քննություն է գնում, իսկ Թոքմաջյանը պնդում է, թե դա «սարքած» պատմություն է, որով փորձ է արվում վարկաբեկել իրեն, սակայն անգամ բուհի դասախոսական կազմն է պնդում, որ այդ ամբողջ պատմությունը իրական է: