Հրաժարվել են ցուցմունք տալուց, տղաներից մեկն էլ հացադուլ է անելու

Նորք Մարաշում վնասազերծված «հանցավոր» խմբավորման անդամներից 3 աղջիկները՝ Մարինե Կատանյանը, Ասյա Մկրտչյանը և Նելլի Մինասյանը հրաժարվում են ցուցմունք տալուց: Այս մասին Fnews.am-ի հետ զրույցում ասաց դատարանում նրանց շահերը ներկայացնող Ինեսսա Պետրոսյանը: Նրանց մեղադրանք է առաջադրվել ՀՀ քրեական օրենսգրքի 223 հոդվածի 1-ին եւ 2-րդ մասերով՝ (Հանցավոր համագործակցություն ստեղծելը կամ հանցավոր համագործակցությանը մասնակցելը) եւ 235-րդ հոդվածի 3-րդ մասով (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը): Աղջիկները այժմ գտնվում են «Աբովյան» ՔԿՀ-ում:

«Մենք հավանաբար կբողոքարկենք խափանման միջոց կալանքի ընտրությունը: Պետք է նրանց հետ զրուցեմ և հստակ որոշենք մեր հետագա անելիքները»,-ասաց պաշտպանը: Նա տեղեկացրեց, որ որ իր պաշտպանյալները երեքն էլ առաջադրված մեղադրանքը չեն ընդունում: «Նրանք հրաժարվել են ցուցմունք տալուց, եւ այս պահին ես էլ կաշկանդված եմ նախաքննական գաղտնիքով եւ ավելին ասել, քան այն, որ իրենց մեղսագրված արարքը չեն ընդունում, չեմ կարող»:

Ի դեպ մենք ավելի վաղ տեղեկացրել էինք, որ այղջիկները նոյեմբերի 25-ին եղել են վերը նշված բնակարանում Մարինե Կատանյանի, Ասյա Մկրտչյանի մայրը մեզ հետ զրույցում ասել էր, որ իր աղջիկները որևէ կապ չունե զինված հանցախմբի հետ: Գևորգ Ջնդոյանի քույրն էլ մեզ հետ զրույցում նշեց, որ իրենք ևս միջնորդություն են ներկյացնելու որպեսզի խափանման միջոցը փոխեն: «Հոգևոր մարդը ինչպես կարող էր զենք ձեռքը վերցնել ու կռվել, դա անհնար է»,-ասաց քույրը: Նա տեղեկացրեց, որ եղբայրը հնարավոր է հացադուլ սկսի՝ ի նշան բողոքի: «Ասում է ինքը մեղավոր չէ, և որևէ կապ չունի, ու մինչև վերջ պայքարելու է արդարության համար: Հիմա փորձում ենք նրան համոզել, որ ետ կանգնի իր որոշումից և հացադուլ չսկսի»,-ասաց Գևորգի քույրը: