Հունգարիայի հայ համայքը ՊՆ-ից պատասխան է սպասում Գուրգեն Մարգարյանի հուշատախտակի տեղադրման հարցով

Հունգարիայի հայ համայնքն այդ երկրի Պաշտպանության նախարարությունից պատասխան է սպասում Գուրգեն Մարգարյանի հուշատախտակի տեղադրման հարցի շուրջ: Այս մասինNEWS.am-ին տեղեկացրեց Հունգարիայի Հայկական ազգային ինքնավարություն կազմակերպության փոխնախագահ Նիկողոս Հակոբյանը:

Նրա պարզաբանմամբ, անմիջականորեն սպանության վայրի մոտակայքում հուշատախտակի տեղադրումն անհնար է տեխնիկական պատճառներով: «Մենք Հունգարիայի Պաշտպանության նախարարությանը նամակ ենք ուղարկել: Նրանք խոստացել են հուշատախտակի տեղադրման համար այլ վայր հատկացնել: Հիմա ՊՆ-ից պատասխան ենք սպասում»,- նշեց Նիկողոս Հակոբյանը:

Համայնքի ներկայացուցիչը նաեւ նշեց, որ հուշատախտակի վերջնական տարբերակը կախված է հատկացված վայրից, դրան չափերից եւ շրջակա տարածքից: «Հայաստանից քանդակագործ Աշոտ Բաղդասարյանը պատրաստակամություն հայտնեց անհատույց պատրաստել հուշատախտակը»,- տեղեկացրեց Նիկողոս Հակոբյանը:

Հիշեցնենք. 2004 թվականի փետրվարի 19-ին Հայաստանի Զինված ուժերի զինծառայող Գուրգեն Մարգարյանը քնած ժամանակ կացնով գլխատվեց ադրբեջանցի Ռամիլ Սաֆարովի կողմից: Ստոր հանցագործությունը տեղի ունեցավ Բուդապեշտում, որտեղ երկու սպաները մասնակցում էին ՆԱՏՕ-ի «Գործընկերություն հանուն խաղաղության» ծրագրի շրջանակում կազմակերպված անգլերենի դասընթացներին: Վայրագ արարքի պատճառը մեկն էր. Գուրգեն Մարգարյանը հայ է:

մանրամասն՝ այստեղ: