ՀՅԴ Բյուրոն կոչ է անում հետ կանգնել վտանգավոր արկածախնդրությունից եւ սկսել խաղաղության բանակցություններ

ՀՅԴ Բյուրոն կոչ է անում Թուրքիային հետ կանգնել վտանգավոր արկածախնդրությունից եւ սկսել խաղաղության բանակցություններ:

ՀՅԴ Բյուրոյի տարածած հայտարարությունում ասվում է.

«Երեւանում գումարված իր արտահերթ լիագումար նիստում, ՀՅԴ Բյուրոն որոշել է հրատարակել հետեւյալ հայտարարությունը.

Հայ Յեղափոխական Դաշնակցությունը խոր մտահոգություն է հայտնում Թուրքիայի կառավարության կողմից քուրդ ժողովրդի նկատմամբ վերջերս վերսկսված ռազմատենչ քաղաքականության վերաբերեալ:

Քուրդ ղեկավարության կողմից առաջադրված խաղաղության բանակցությունները շարունակելու փոխարեն, թրքական իշխանությունները, խորհրդարանական վերջին ընտրությունների արդյունքներից դժգոհ՝ «Իսլամական պետություն» խմբակցության դեմ ռազմական գործողություններ կատարելու պատրվակով իսկական պատերազմ են սանձազերծել քուրդ ժողովրդի դեմ: Մի քայլ, որը անխուսափելիորեն հանգելու է Թուրքիայի բոլոր ժողովուրդների նկատմամբ հալածանքների, ընդհանրապես մարդու իրավունքների զանգվածային ոտնահարման եւ Թուրքիայի հասարակության ժողովրդավարացման գործընթացի խափանման։

Նկատի ունենալով տարածաշրջանի բոլոր ազգությունների եւ երկրների խաղաղ գոյակցության կարեւորագույն հարցը, տարածաշրջանը զերծ պահելու համար տագնապներից եւ անկանխատեսելի մարդկային կորուստներից՝ մենք կոչ ենք ուղղում հետ կանգնել վտանգավոր արկածախնդրությունից եւ սկսել խաղաղության բանակցություններ»: