Ի՞նչ է սպասվում «ժառանգություն» կուսակցությանը

«Ժառանգություն» կուսակցությունում ստեղծված վիճակը փոխաբերական իմաստով կարելի է բնորոշել, որ «շունը տիրոջը չի ճանաչում»։ Սեփական արժեքային համակարգն ու դիմագիծն ունեցող կուսակցությունը, դատելով նրա շուրջ ընթացող զարգացումներից, կարող է փլուզվել՝ համալրելով հայաստանյան քաղաքական թատերաբեմից անհետացած քաղաքական ուժերի շարքը։

«Ժառանգություն» կուսակցության նախկին անդամ, ԱԺ նախկին պատգամավոր Ստեփան Սաֆարյանը, վերլուծելով կուսակցության վերջին շրջանի գործունեությունը, նշում է․ «Եթե վերանանք անձերից, ապա «Ժառանգության» ներսում հետեւյալ երկու մոտեցումների բախումն է՝ գնալ գաղափարախոսությունը եւ ծրագրին համապատասխա՞ն, թե՞ գնալ իշխանափոխության՝ ցանկացած գնով եւ ցանկացած մեկի հետ։ Վերջին 3-4 տարիների ընթացքում «Ժառանգությունը» գնացել է վերջին ճանապարհով՝ իշխանափոխություն ցանկացածի հետ եւ ցանկացած գնով։ Քառյակի շրջանակներում նրա մասնակցությունը գաղափարապես եւ ծրագրերով տարբեր եւ հակադիր ուղղություններով կուսակցությունների հետ, ինչպիսիք էին՝ «Հայ ազգային կոնգրեսը», «Բարգավաճ Հայաստանը», Հայ հեղափոխական դաշնակցությունը, որեւէ արդյունք եւ քաղաքական կապիտալ չբերեցին կուսակցություններին, առավել եւս՝ «Ժառանգությանը»։ Եվ նպատակը մնաց ձախողված։ Հետագայում կուսակցությունը բոյկոտեց խորհրդարանական կառավարմանը վերաբերող սահմանադրական փոփոխություններին մասնակցելը, թեպետ ինքը կողմ էր խորհրդարանական կառավարմանը»։

Մեր զրուցակիցը հիշեցնում է, որ դրանից հետո էլ «Ժառանգությունը» միացավ «Նոր Հայաստան» շարժմանը, «Սասնա ծռեր»-ի գործողություններին, որը կարելի է նույնպես ձեւակերպել «իշխանափոխություն ցանկացածի հետ ցանկացած գնով»-ի շարունակություն։ Ըստ Ստեփան Սաֆարյանի՝ դրանք չէին կարող բերել դեվիդենտներ, քանի որ որեւէ արդյունքի չհանգեցրին։ Իսկ դա հանգեցրեց նրան, որ «Ժառանգությունը» մոռացավ իր գաղափարախոսությունը։

«Եվ այսօր կա այդ խնդիրը՝ գնալ միայնա՞կ, երբ խաղի կանոնները բարդացել են, կա շեմը հաղթահարելու խնդիր, թե՞ գնալ դաշինքով։ Այստեղ էլ մենք տեսնում ենք, որ Րաֆֆի Հովհաննիսյանը եւ Արմեն Մարտիրոսյանը հայտարարում են, որ պետք է լինի իշխանափոխություն ցանկացածի հետ, ինչին ընդդիմանում է Զարուհի Փոստանջյանը եւ հայտարարում, որ Րաֆֆի Հովհաննիսյանը չի ներկայացնում կուսակցության դիրքորոշումը։ Սա արդեն խոսում է բավականին բարդ կոնֆլիկտի մասին, եւ այդ կոնֆլիկտը լուծելու համար է, որ երեկ լսեցինք, որ «Ժառանգությունը» միանում է Սեյրան Օհանյանի, Վիկտոր Դալլաքյանի եւ Արամ Գասպարի Սարգսյանի հիմնադրած դաշինքին»,- ասաց Ստեփան Սաֆարյանը։

Իսկ դաշինքի մեջ մտնելու դեպքում, ըստ մեր զրուցակցի, բնականաբար, դաշինքն ունենալու է իր անունը, եւ «ժառանգությունն» այլեւս չի լինի։ Ստեփան Սաֆարյանը հիշեցնում է, որ ինքը «ժառանգություն»-ից հեռացել է այն պատճառով, որ դեմ է եղել «ցանկացածի հետ ցանկացած գնով իշխանափոխություն» բանաձեւին։ Մինչդեռ, ժամանակին, այդ բանաձեւին կողմ են եղել Ռուբեն Հակոբյանը, Արմեն Մարտիրոսյանը եւ վարչության այլ անդամներ։ Իսկ ինքն, օրինակ, կողմ է եղել ՀՀ-ԵՄ հարաբերությունների խորացմանը, կողմ է եղել, որ «Ժառանգությունը» հավատարիմ մնա իր գաղափարախպոսությանը, որի շնորհիվ 2007-2012թթ․ ձեռք էր բերել հանրային մեծ վստահություն։

Hraparak.am