Ի՞նչ իմաստ ունի այսօր բաժանել գոյություն չունեցող իշխանության պաշտոնները. Հայկ Բաբուխանյան

Այսօր հրապարակվել է «Հայրենիքի փրկության» շարժման այն հայտարարությունը, որ 17 կուսակցությունների խորհուրդը որոշել է ընդլայնել իր ձեւաչափը՝ ձեւավորելով «Հայրենիքի փրկության շարժում», նրանք հանդես են գալիս  վարչապետի միասնական թեկնածուով ի դեմս` Վազգեն Մանուկյանի:
 Այս կապակցությամբ  մենք դիմեցեինք  17 կուսակցություններից մեկի` «Սահմանադրական Իրավունք Միություն» կուսակցության նախագահ Հայկ Բաբուխանյանին: 

- Պարոն Բաբուխանյան, ինչո՞վ է պայմանավորված «Հայրենիքի փրկության շարժում» ձեւավորելը, եւ ովքե՞ր են կազմում շարժման խորհուրդը:

- Նոր եմ տեղեկանում այդպիսի շարժում ձեւավորելու մասին, եւ, պատկերացում չունեմ թե ովքեր են այդ շարժման ղեկավարները ովքեր են:

-«Հայրենիքի փրկության շարժման» խորհուրդը հանդես է եկել հայտարարությամբ, որում ասվում է. 17 կուսակցությունների խորհուրդը որոշել է ընդլայնել իր ձեւաչափը՝ ձեւավորելով Հայրենիքի փրկության շարժում:

 -Գուցե դա այլ 17 կուսակցությունների խորհուրդն է, որի մեջ մենք չենք մասնակցում:

-Ինչո՞ւ հենց այս պահին   է հնչել 17 կուսակցությունների միասնական թեկնածուի անունը եւ  ինչից ելնելով է ընտրությունը կանգ առել Վազգեն Մանուկյանի վրա, քանի որ մինչ այդ մի շարք անուններ էին շրջանառվում:

-  ՍԻՄ կուսակցությունը  լինելով 17 կուսակցությունների ֆորմատի  մեջ, սակայն չի մասնակցել  ձեր նշած որոշման կայացմանը: Եթե իրոք կա այդպիսի որոշում, ապա այն կայացվել է առանց մեզ եւ մենք այդ որոշման համար որեւէ պատասխանատվություն չենք կրում: Ավելին,  կարծես թե կար պայմանավորվածություն անձերի անուններ չտալ: Թե ով եւ երբ է փոխել այդ պայմանավորվածությունը չեմ կարող ասել:

- Այդ դեպքում ինչպե՞ս է հայտարարությունը ներկայացվում 17 կուսակցությունների անունից:

- Նույնպես չեմ կարող ասել, քանի որ  այդ որոշումից տեղեկացված չեմ: Գուցե կա 17 կուսակցությունների մեկ այլ ֆորմատ, այլ կազմով: Բանն այն է, որ այս ընթացքում որոշ կուսակցություններ դուրս են եկել,  այլ կուսակցություններ միացել: Համենայնդեպս,  հստակ ցուցակ, թե որ կուսակցություններ են ներկա փուլում «17-ի» ֆորմատի մեջ կարծես թե չկա: 

- Իսկ ՍԻՄ-ը շարունակո՞ւմ է մնալ 17 կուսակցությունների ֆորմատի մեջ:

- Մենք պատասխանատու ենք  այն  համատեղ հայտարարությունների  եւ գործողությունների համար, որոնց տվել ենք մեր հավանությունը: Մասնավորապես մենք  պնդում ենք, որ Փաշինյանը  եւ իր թիմը պետք է հրաժարական տան եւ որ պետք է շատ արագ անցկացվեն Ազգային ժողովի արտահերթ ընտրություններ: Մենք  շարունակում ենք մնալ այն կարծիքին, որ պետք է ստեղծվեր «Ազգային փրկության  կոմիտե», որը  այդպես էլ չստեղծվեց: Մեր կարծիքով այդ կոմիտեն պետք է բաղկացած լիներ նոյեմբերի 9-ի հայտարարությունը ստորագրած 17 կուսակցությունների ներկայացուցիչներից եւ հանրային հեղինակություն, մասնագիտական եւ միջազգային ճանաչում ունեցող անհատներից, ունենար իր աշխատանքային կանոնակարգը, հաստատված ճանապարհային քարտեզը եւ այլն: Եթե ինչ-որ տեղ որոշել են լուծարել մինչ այժմ գործող 17  կուսակցությունների ֆորմատը,  ստեղծելով «Հայրենիքի փրկության շարժում», մեզ համար անհայտ կերպով նույնիսկ հասցրել են ձեւավորել այդ շարժման խորհուրդ, ապա հարցը պետք է ուղղել համապատասխան հասցեատիրոջը: ՍԻՄ-ը մինչ օրս եղել է «17»-ի ֆորմատի մեջ:

- Այսպիսով Դուք կո՞ղմ եք, թե՞ դեմ եք Վազգեն Մանուկյանի թեկնածությանը:

- Մեծ հարգանք ունենալով պրն. Մանուկյանի հանդեպ, եւ ճանաչելով նրան 1988թ.-ից, այնուամենայնիվ, պետք է ասեմ, որ մենք ո՛չ կողմ ենք, ո՛չ էլ դեմ ենք: Մենք այդ հարցը պարզապես չենք քննարկել: Ընդ որում, մենք չենք քննարկել ոչ մի  անձնական հարց: Նման հարց քննարկելուց առաջ պետք է հասկանալ, թե  այս կամ այն  վարչապետի թեկնածուն  ի՞նչ կաբինետով է գալիս, ինչպիս՞ի ծրագրով, ինչպիսի՞ ճանապարհային քարտեզով, արդյո՞ք պատրաստ է նա պատասխանատվության ենթարկել Փաշինյանի հանցավոր ռեժիմի պարագլուխներին, արդյո՞ք  իր տեղում մնալու է Արմեն Սարգսյանը եւ նման բազմաթիվ հարցեր:

Եվ վերջապես,  դեռեւս լուծված չէ հիմնական հարցը` Նիկոլի հրաժարականը, եւ ինչ իմաստ ունի այսօր  բաժանել գոյություն չունեցող ապագա իշխանության պաշտոնները: Երբ որ մենք կհասնենք մեր հիմնական նպատակին` Նիկոլի հրաժարականին, այն ժամանակ էլ  պետք է քննարկել կոնկրետ թեկնածուների հարցը, որոնք  կկարողանան իրականացնել ամբողջական իշխանափոխության ճանապարհային քարտեզը: Շատ կարեւոր է նաեւ, որ ապագա կառավարությունը անկախ նրանից` անունը կդնենք անցումայնին, թե ոչ, կկարողանա լուծել երկրի առջեւ դրված կարեւորագույն  եւ հրատապ խնդիրները: Այդ առումով կարեւոր է, որ ապագա վարչապետը ունենա վստահության  պաշար Ռուսաստանի Դաշնությունում:  

- Այդ դեպքում որո՞նք են լինելու ՍԻՄ կուսակցության  հետագա քայլերը:

- Մեր կուսակցությունը դեռեւս  մինչեւ պատերազմի սկիզբը` սեպտեմբերի 18-ը հանդես է եկել հայտարարությամբ, որտեղ պահանջվում էր Նիկոլի հրաժարականը: Ինչպես նաեւ բազմաթիվ հարցեր էին բարձրացվում եւ ուղենշվում դրանց լուծման ճանապարհները: ՍԻՄ-ը ունի իր քաղաքական օրակարգը եւ մենք  այդ օրակարգը իրականացնելու ճանապարհին  համագործակցում ենք ինչպես  «17-ի ֆորմատում» գտնվող, այդպես էլ`  այդ ֆորմատից դուրս գործող բազմաթիվ ընդդիմադիր կուսակցությունների, հասարակական կազմակերպությունների ու անհատների հետ:  

Ա.Հակոբյան