Ի՞նչ կապ է ունեցել Հովակ Գալոյանը էքստրասենսի սպանության մեջ մեղադրվող երիտասարդի հետ

Aravot.am-ը գրում է.

Հ. Պարոնյանի անվան թատրոնի դերասան Հովակ Գալոյանը անձամբ ճանաչել է «6-րդ զգայարան» հաղորդման մասնակից, որպես էքստրասենս հայտնի Անի Մաջնունյանի սպանության մեջ մեղադրվող Մխիթար Մուշեղյանին:

Դերասանը Aravot.am-ին պատմեց, որ մի անգամ նույնիսկ այցելել է նրանց տուն, ծանոթացել նաեւ Մխիթարի նախկին կնոջն ու երեխային, ում հետ նույնիսկ նկարվել է. «Մի անգամ Նոր տարուց հետո հրավիրեց իրենց տուն սուրճ խմելու, մի կես ժամով մտա, սուրճ խմեցի ու գնացի»: Դերասանը, սակայն, քիչ բան պատմեց իր եւ Մխիթարի ծանոթության մասին, հերքեց մեր տեղեկությունը, թե Մխիթարի հետ շատ ջերմ հարաբերությունների մեջ է եղել:

Մեր տեղեկություններով, դերասանը Մխիթարի երեխայի քավորն է, բայց Հովակ Գալոյանը հերքեց նաեւ այս տեղեկությունը. «Ինքը Սունդուկյան թատրոն էր հաճախում, ես իրեն այնտեղից գիտեմ: Գալիս-գնում էր, մենք Սունդուկյան թատրոնում «Ինձ մի լքիր» ներկայացման փորձերն  էինք այդ ժամանակ անում:

Որպես դերասան նրա խաղը բեմում չեմ տեսել, ոչինչ չեմ կարող ասել, բայց որպես մարդ՝ պարկեշտ, նորմալ անձնավորություն էր, վատ տպավորություն չի թողել»: Հովակ Գալոյանի տպավորությամբ, Մխիթարը սոցիալական նորմալ պայմաններում էր ապրում. «Կարդացած, գիտելիքներով տղա էր, ուզում էր բեմադրություն անել, սցենար էր գրել, առաջարկեց՝ կարդամ, ասում էր՝ քո  կարծիքն եմ ուզում իմանալ, բայց այդպես էլ չզանգահարեց: Հետաքրքիր բաներ կար, որոնք ուզում էր անել»: Հիշեցնենք, որ Մխիթար Մուշեղյանը «Յանուս» թատրոնի տնօրենն էր: