Ինչն է հիմնականում գազալցականների պայթյունների պատճառը...

Հայաստանում արդեն 20 տարի է, ինչ գործում են գազալցակայաններ, iիսկ ավտոտրանսպորտային միջոցների 90 տոկոսը շահագործում է բնական գազ: Չնայած նրան, որ գազի օգտագործումը շահավետ է, էկոնոմ եւ արդյունավետ, այնուամենայնիվ երբեմն տեղի են ունենում դժբախտ պատահարներ պայմանավորված տեխնիկական կանոնների, նորմերի խախտումներով:  Թե ի՞նչն էր գազալցակայաններում պայթյունների հիմնական պատճառները, Fnews.am-ը փորձեց  պարզել ՏԿԱԻՆ պետական, հրդեհային եւ տեխնիկական անվտանգության քարոզչության բաժնի պետ ՍԵՐԳԵՅ ՀԱՅԱՊԵՏՅԱՆԻՑ, ով մասնավորապես նկատեց.
- Պայթում են ոչ թե գազալցակայանները, այլ պայթում են մեքենայի բալոնները: Այս տարի մենք ունեցել ենք գազալացակայանների չորս պայթյուն, որից երեքի դեպքում պայթել են մեքենայի բալոնները: Այսինքն, երեք դեպքերում էլ գազլցակայանի խնդիր, որպես այդպիսին չի եղել: Չորս դեպքերից միայն մեկի ժամանակ ` Զվարթնոց գյուղի մոտակայքի գազալցակայաններ, որտեղ պայթունի պատճառը նախնական տվյալներով եղել է մարդկային անփութությունը:
- Պարոն Հայրապետյան, Զվարթնոց գյուղի գազալցակայանում տեղի ունեցած պայթյունի հետ կապված` գազալցակայանի սեփականատեր Հակոբ Հակոբյանը նշում էր, որ թեեւ գազալցակայանը տուգանվել էր որոշակի խախտումների պատճառով, բայց, այնուհանդերձ շահագործումը չէր արգելվել: 

-Իսկ ընդհանուր առմամբ, տեխնիկակական եւ հրդեհային անվտանգության առումով ինչպիսի՞ն է հանրապետությունում գործող գազալցակայանների վիճակն այսօր:

-Բնականաբար կան գազալցակայաններ, որ համեմատաբար բարվոք վիճակում են, կան գազալցակայաններ, որոնք ունեն թերություններ` դա ոչ ոք չի թաքցնում: Եվ այդ առումով պետք է ասեմ, որ թեեւ մենք մշտապես հետեւել ենք գազացակայանների հրդեհային անվտանգությանը, բայց երեկվանից սկսած ստեղծվել են աշխատանքային խմբեր, որոնք իրականացնում են ստուգայցեր հանրապետության բոլոր գազալցակայաններում: Գազալցակայաններում պայթյունից խուսափելու համար, մեր կարծիքով, պետք է ուշադրությունը սեւեռել գազալցավորման բալոնների վրա, քանի որ պայթյունների մեծ մասը կապված են ավտոմեքենաների բալոնների հետ: Եւ  բալոններն էլ հիմնականում պայթում են այն պատճառով, որ սահմանված նմուշի բալոններ չեն, փորձակումներ անցած չեն, այնպիսի բալոներ են, որոնք նախատեսված չեն տվյալ գազի լիցքավորման համար: Հենց այս խնդրի վրա պետք է ուշադրություն դարձվի, որը, ցավոք սրտի, մեր իրավասության սահմաններում չի: Մենք տարիներ շարունակ առաջարկել ենք, որպեսզի այդ գազաբալոնները համարվեն արտադրական վտանգավոր օբյեկտ եւ մտնեն օրենքի դաշտ, ըստ որի իրենք պարտադիր տարին մեկ անգամ կանցնեն փորձաքննություն եւ դրանով էապես կնվազի նմանօրինակ դեպքերի քանակը:

Տաթեւիկ Աբրահամյան