Ինչո՞ւ սեւ կատու անցավ «Քանկոր» ԲԿ-ի եւ Սինանյանների ընտանիքի միջեւ...

Բոլորովին վերջերս համացանցը ողողվեց ֆեյսբուքյան օգտատեր Գուրգեն Սինանյանի գրառմամբ: Գրառումը վերաբերում էր սրտաբան Շահեն Խաչատրյանին, քանի որ օգտատերը իր վրդովմունքն էր հայտնել այն մասին, որ Շ. Խաչատրյանը դրամաշորթությամբ է զբաղվում և նրանից պետք է զգուշանալ: Գրառման մեջ խոսք էր գնացել նաեւ այն մասին, որ 2011թ-ից Գուրգեն Մինասյանի հայրը բուժվել է Շահեն Խաչատրյանի տնօրինության տակ գտնվող «Զեյթունի սիրտ-անոթ» ԲԿ-ում, և տարիներ շարունակ նրանց խաբել են, գումարներ շորթել և նորմալ բուժում չեն տվել, ինչի արդյունքում նրանք ստիպված հիվանդին տեղափոխել են մեկ ուրիշ բժշկական կենտրոն, որտեղից էլ սկսկվել է այս պատմության թնջուկը:

Թե իրականում ի՞նչ սեւ կատու է անցել հիվանդի ու հիվանդանոցի տնօրինության միջեւ, եւ թե ո՞րն է պատճառը, որ այսօր Սինանյանների ընտանիքը նման հայտարարությամբ է հանդես եկել, Fnews.am-ը փորձեց ստանալ «ՔԱՆԿՈՐ» սիրտ-անոթային ԲԿ-ից:
Fnews.am-ի հետ զրույցում «ՔԱՆԿՈՐ» սիրտ-անոթային ԲԿ-ի գործադիր տնօրեն Կարեն Հարությունյանը, լսելով հարցը պատմեց հետեւյալը.
-Այո, 2011թ-ին մենք իրոք ունեցել ենք նման հիվանդ` Արշամ Տիգրանի Սինանյանը, ում սրտի ցավերով, գանգատներով բերել են հիվանդանոց: Կատարվել է կոռոնոգրաֆիա, որի արդյունքում պարզվել է, որ հիվանդը կարիք ունի ԱԿՇ (արտո կորոնալ շունտավորում) վիրահատության: Կոռոնոգրաֆիայի և վիրահատության գումարը նրանք վճարել են հենց նույն օրը (200.000-կոռոնոգրաֆիա, 2.260.000- վիրահատություն ): Ինչ վերաբերվում է հուսադրելուն, ապա բժիշկը միշտ էլ հուսադրում է հիվանդին, հույսը ամենակարևորն է ցանկացած բուժման ընթացքում: Իսկ հիվանդ մարդուն, այն էլ սրտի խնդիր ունեցող մարդուն, ինչքան էլ վիրահատես, նա էլի հիվանդ է մնում: Կարևորն այնն է , որ նա հիմա ապրում է` թե ինչ վիճակում է առողջությունը, դա արդեն հիվանդության փուլերից է կախված:

-Ի դեպ, հիվանդի հարազատները դժգոհել էին, որ Ձեր հիվանդանոցում խաբել են նրանց, և որ սրտի վիրահատության ժամանակ 4 շունտի փոխարեն 3 շունտ են տեղադրել…

-Ուրեմն այսպես.2012-ին հիվանդին սուր ցավերով բերել  են հիվանդանոց, կատարվել է կոռոնոգրաֆիա և շունտոգրաֆիա, որի արդյունքում պարզվել է, որ շունտերից մեկը փակված է և անհրաժեշտ է դրանք բացել ` շտենդավորման   միջոցով: Հիվանդանոցը 1.100.000 դրամի փոխարեն պահանջել է ընդամենը 700.000 դրամ, որն էլ  նրանք վճարել են: Հիվանդի որդու նշած վատ երակ ասվածը բժշկական անգրագիտություն է, իսկ երակն էլ վատն է դարձել իր հիվանդության հետևանքով: Ոչ մի բժշկական սխալ մեր կողմից չի եղել, իսկ շունտերի քանակից վիրահատության գինը չի փոխվում, քանի որ շունտը դա ստենդ չէ, դա երակ է ` հենց իր իսկ մարմնից:

-Ի դեպ, օգտատեր Գուրգեն Սինանյանը նշել էր նաեւ այն մասին, որ 2015թ. հուլիսի երկուսին հիվանդության թոշակը ստանալու պահին իրենք պարզել են, որ Արշամ Սինանյանի հաշմանդամության թոշակի և գույքի վրա կալանք է դրված: Ավելին, Դ.Ա.Հ.Կ ներկայանալուց հետո նրանք պարզել են, որ «Քանկոր» բժշկական կենտրոնը Ա. Սինասյանից պահանջել է 1.850.000 դրամ, որն առաջացել է չվճարված 270.000 դրամի տոկոսներից։ Ի ՞նչ կասեք սրա վերաբերյալ:

-Ճիշտ է,  «Քանկոր»-ը   դիմել դատարան, այլ ոչ թե հիվանդը, կամ հարազատները: Բանն այն է, որ երբ հիվանդին 3-րդ անգամ բերեցին հիվանդանոց, նորից հետազոտություններ կատարվեցին և պարզվեց, որ կարիք կա կրկնակի ԱԿՇ վիրահատության: Դրա արժեքը 2.400.000 դրամ էր, որն էլ  մենք զեղչել ենք և դարձրել 1.835.000 դրամ: Նրանք մասնակի մարումներն իհարկե  արեցին, և մնացել էր ընդամենը 270.000 դրամ, որն էլ  մինչ այսօր նրանք չեն վճարել: Մենք ներքին աուդիտ արեցինք, պարզվեց, որ այդ մարդը արդեն մի քանի տարի է պարտք ունի և դիմեցինք դատարան: Դատարանն էլ կալանք է դրել պայմանագրով հաստատված գումարի ` 1.835.000 դրամի վրա, սակայն մենք միջնորդագիր պետք է ներկայացնենք, որպեսզի կալանք դրվի միայն 270.000 դրամի չափով նրան պատկանող գույքի և դրամական միջոցների վրա:

-Այդուհանդերձ, դուք վստահ ե՞ք, որ Արշամ Սինանյանի վիրահատության ընթացքում բժշկական սխալ, որպես այդպիսին Ձեր հիվանդանոցի, կամ բժշկի կողմից թույլ չի տրվել:

-Ոչ մի բժշկական սխալ չի եղել: Այս, եւ բոլոր հիվանդների պատմության հետ կապված մենք ունենք բժշկական փաստաթղթերի բոլոր օրինակները, եւ մի քանի տարվա ողջ պատմությունը:

Աննա Առաքելյան