Ինչքան երեւում է,Պաշտպանության նախարարը այլևս իվիճակի չէ կարգի հրավիրել իր ենթականերին

Բանակը եղել է չալաղաջը և բոլորը փորձել են օգտվել. այլ բան է` ով ինչ ձևով է դա արել

Հայտնի է, որ գարնանը ՀՀ ՊՆ վարչական համալիրի մոտակայքում կաշառք ստանալու պահին ձերբակալվեց և կալանավորվեց ՀՀ ՊՆ նյութատեխնիկական դեպարտամենտի տեխնիկական ապահովման վարչության գլխավոր մասնագետ Արսեն Ղարիբջանյանը: Նույն օրը կալանավորվեց նաեւ ՀՀ ՊՆ վերահսկիչ վարչության ընդհանուր վերահսկման բաժնի պետ, գնդապետ Սամվել Խաչատրյանը:
Մամուլում տեղ գտած հրապարակումների համաձայն` մինչ այս կալանավորումները, ՀՀ ՊՆ Սեյրան Օհանյանի անվտանգության պետ Սերգեյ Հայրապետովը ծեծի է ենթարկել Արսեն Ղարիբջանյանին` ստիպելով «գրել» Ս. Խաչատրյանի դեմ:

Քաղաքական վերլուծաբան Ստյոպա Սաֆարյանը Fnews.am-ի հետ զրույցում չհերքեց, որ նման բան կարող էր տեղի ունենալ, սակայն նշեց, որ չի ուսումնասիրել դեպքն ու չի կարող կարծիք հայտնել: Նա որպես վերլուծաբան տեսնում է մի կողմից արշավ` Պաշտպանության նախարար Սեյրան Օհանյանի դեմ, մյուս կողմից` այս հարցում նախարարին մոտ շրջանակների ներգրավվածություն: Այն, որ ՊՆ կողմից իրականացվող գնումների գործընթացը ունեցել է խայտառակ արատներ, ինչպես և պետական համակարգի մնացած գնումներն ունեն, Ստյոպա Սաֆարյանը կասկած չունի, սակայն ըստ նրա` կատարվածն այնքան էլ վստահությւն չի ներշնչում, ուստի զերծ է մնում մեկնեբանություններից: «Սա մի հարց է, որն ամիջականորեն անդրադառնում է բոլորի անվտանգության վրա, բայց ես այս պահին այս գործով հիմքեր չունեմ, թե արդյոք պատասխանատվության ենթարկվել է նա, ով փորձել է խաղեր տալ գնման գործընթացի վրա, թե նա, ով պայքարել է դրա դեմ:

Մի բան է պարզ, որ այս գործով շատ շատերն են ներգրավված եղել. ոչ միայն Պն-ից, այլև դրանից դուրս…Պետության փողերի զգալի մասը ծախսվում է բանակի վրա, բանակը եղել է չալաղաջը և բոլորը փորձել են օգտվել. այլ բան է` ով ինչ ձևով է դա արել»,-նկատում է Սաֆարյանն, ում խոսքով` այս գործը խնդրահարույց է:

Քաղաքագետ Գագիկ Համաբարյանն էլ նկատում է, որ այն, ինչ տեղի է ունենումՊաշտպանության նախարարությունում, ուղղակիորեն տխրեցնում է: Նա նկատում է, որ քառօրյա պատերազմից հետո հայկական բանակում առկա կոպիտ սխալներն ուղղելու փոխարեն` սկսկվել է մի պայքար, թե ով ում ոտքերի տակ պետք է օճառ դնի և խաղից դուրս հանի. «Սա սարսափելի է Հայաստանի և առավել ևս երկրի բանակի համար: Ես շատ ուրախ կլինեմ, որ այս խայտառակությանն անմիջականորեն վերջ դնի հանրապետության նախագահը… Ինչքան երևում է, Պաշտպանության նախարարը այլևս իվիճակի չէ կարգի հրավիրել իր վերահսկողության տակ գտնվող անձանց»,-նշեց Համբարյանը:

Նրա դիտարկմամբ` այս ամենը նորմալ երևույթ չէ և պատերազմող երկրի համար պաշտպանության նախարարությունում պաշտոնյաներն իրավունք չունեն նման խարդավանքների մեջ գտնվել և իրենց կեղտոտ խաղերն ի ցույց դնել ամբողջ հասարակությանը և թշնամիներին:
Քաղաքագետի գնահատմամբ ընդհանրապես կառավարությունը կոռուպցիայի դեմ պայքարի աշխատանքերում թերացումներ ունի: Նա բերում է քաղաքակիրթ երկրների օրինակը, որտեղ պաշտոնյաների կոպիտ սխալների դեպքում, նրանց ոչ միայն ազատում են պաշտոնից, այլև քրեական գործ են հարուցում և զրկում գեներալի կոչումից: «Գեներալները, որոնց ազատել են պաշտոններից, եթե իհարկե մեղավոր են, պետք է ոչ միայն ազատվեին այլև բոլորը ձերբակալվեին… »,-ասում է քաղաքագետն ու կրկնում. «Այն ինչ որ տեղի է ունենում ՊՆ-ում, ոչ միայն պատիվ չի բերում Հայաստանին, այլև շատ արագ արտացոլվում է ադրբեջանական մամուլում»: