Ինչու են ուզում վերադարձնել Ծառուկյանին...

Օրեր շարունակ մի քանի տասնյակ ակտիվիստներ ու «Բարգավաճ Հայաստան» կուսակցության կողմնակիցներ ակցիա էին կազմակերպել Գագիկ Ծառուկյանի տան դիմաց` պահանջելով նրա վերադարձը:

Թե ովքեր են կանգնած այդ ակցիայի հետևում և ո՞ւմ է հարկավոր Գագիկ Ծառուկյանի վերադարձը սոցիոլոգ Ահարոն Ադիբեկյանը մի քանի վարկած է առաջ քաշում, որոնցից ամենահավանականը, ըստ նրա, մեկն է. Ծառուկյանի վերադարձը պահանջում են նրանք, ովքեր նրա հեռանալուց հետո շատ բան կորցրեցին:

«Օրինակ Արթուր Բաղդասարյանի վերադարձը ո՞վ պետք է պահանջի, նրանք ովքեր անմիջապես շահ ունեն… Գագիկ Ծառուկյանի դեպքում էլ նույնն է. ԲՀԿ-ի կոալիցիայից դուրս գալը և Ծառուկյանի քաղաքականությունից հեռանալը որոշ մարդկանց զրկեց պաշտոններից և որոշ հնարավորություններից: Հենց այդ մարդիկ են հիմա նախաձեռնել ակցիան, և ուզում են Ծառուկյանը վերադառնա: Նրանք Ծառուկյանի վերադարձի հետ կապում են իրենց կորցրածը վերադարձնելու հույսը…»,-Fnews.am-ի հետ զրույցում ասաց Ահարոն Ադիբեկյանը` զերծ մնալով առաջ քաշել այլ վարկածներ: Նա չի կարծում, թե ակցիայի հետևում կանգնածները ԲՀԿ ներկայիս ղեկավարներն են:

Քաղտեխնոլոգ Արմեն Բադալյանն էլ հակադարձում է. նա վստահ է, որ դա հենց ԲՀԿ ղեկավարների նախաձեռնությունն է: 

«Հարյուրավոր մարդիկ կոչով գնում են Ծառուկյանի մոտ. այնպիսի տպավորություն է, որ հպատակների այց է թագավորի մոտ. ճորտատիրական հասարակարգից վաղուց դուրս ենք եկել: Սա կարող է բացասաբար անդրադառնալ և՛ այդ մարդկանց, և՛ թե այդ կուսակցության վրա: Բայց այս պահին նրանք իրենց վարկանիշի մասին չեն մտածում, նրանք միայն մտածում են ամեն կերպ վերադարձնել Ծառուկյանին, քանի որ չեն պատկերացնում, թե տեղ պետք է զբաղեցնեն քաղաքական դաշտում, եթե չկա առաջնորդը…»,-նկատեց Բադալյանը: Նրա խոսքով, կուսակցությունը չի հայտնվել փակուղային վիճակում, քանի որ ամեն մի դրությունից դուրս գալու ելք կա, այստեղ հարցն այն է, թե ինչ ճանապարհով պետք է դուրս գալ և առաջ գնալ: Հենց այս հարցում է, որ կուսակցությունը իր հույսը դրել է մեկ մարդու վրա: «Եթե մի կուսակցություն չի տեսնում իր անելիքները, և իր ապագան կապում է այս կամ այն գործչի ու կուսակցության ղեկավարի հետ, ուրեմն այդ կուսակցությունն այլևս ապագա չունի: Պատկերացրեք, թե ինչ կլինի եթե իրոք ԲՀԿ նախկին ղեկավարը որոշի չվերադառնալ քաղաքականություն… ի՞նչ է, այդ կուսակցությունը պետք է դադարի գործե՞լ»,-ասաց քաղտեխնոլոգը: Իսկ թե որքանով է հավանական Գագիկ Ծառուկյանի վերադարձը, ըստ վերլուծաբանի, դեռ վաղ է որոշել: Մինչև ընտրությունների մոտենալը դեռ կլինեն ներքին և արտաքին ազդակներ: Նկատենք, որ Ծառուկյանի պատասխանն այս հարցին ևս իրեն երկար սպասեցնել չի տվել: Նա միջոցառումներից մեկի ժամանակ, որին հրավիրված էր, լրագրողների հետ զրույցում հայտարարել է, որ «Եթե անհրաժեշտություն լինի, եթե դրա կարիքը լինի, եթե կարկառուն քաղաքական գործիչները չեն կարողանում առաջ տանել, ես ունեմ հարգանք, ճանաչում, որով անում եմ, եթե անհրաժեշտությունը լինի, դրա կարիքը լինի, հնարավոր ա, որ փակված, ծալած էջը բացվի: Ինչքան մարդը հզոր ա, ուժեղ ա, բարի ա, այնքան կամեցող ա եւ ներող ա, որ բոլոր քաղաքական գործիչներն իմանան, որ Ծառուկյանը նենգ մարդ չի, կամեցող ա, ներող ա»,-հայտարարել է Ծառուկյանը: Նա հիշեցրել է նաև, որ 2015 թվականին ինքը ծալել է քաղաքականության էջը, քանի որ չէր ուզում, որպեսզի արյուն թափվեր: «Հեղափոխություն էր հասունացել, իսկ դա առանց արյուն չէր լինի, բայց ես չէի ուզում, որ ժողովրդի մատից արյուն գար…»: