Ինչ որ անծանոթ առաջարկել է խմել հավաքի մասնակիցներին, սակայն նրանք հրաժարվել են

«Նոր Հայաստան» հանրային փրկության ճակատը շտապ հաղորդագրություն է տարածել՝ տեղեկացնելով, որ «գիիշերվա ընթացքում ոստիկանությունն ապօրինի գործողության միջոցով քանդել և հեռացրել է Ազատության հրապարակում ցրտից պաշտպանվելու համար նախատեսված ծածկը և բերման է ենթարկել նստացույց–հերթապահություն իրականացնողներին։ Բերման ենթարկվածները շուտով ազատ են արձակվել: «Հիմնադիր խորհրդարանի» փոխնախագահ Վարուժան Ավետիսյանն ասաց, որ սադրանք է եղել. «Ոչ մեկի մոտ դանակ, խմիչք չի եղել: Ինչ-որ անծանոթ է մոտեցել շուրջօրյա հավաքի մասնակիցներին, ասել՝ եկեք խմենք, տղաները բնականաբար հրաժարվել են՝ հիմնավորելով, որ չի կարելի այստեղ խմել, եկել են ոստիկաններն ու բերման ենթարկել 7 հոգու: Դե քանի որ ստուգել են, տեսել, որ խմածություն չկա, արագ ազատ են արձակել»,-Fnews.am-ի հետ զրույցում  ասաց նա՝ հավելելով, որ ժամը 14-ին Ազատության հրապարակում ասուլիս է լինելու:

Անդրիաս Ղուկասյանն էլ տեղի ունեցածը հետևյալ կերպ մեկնաբանեց. «Մեծ վտանգ են տեսնում շուրջօրյա բողոքի ակցիայի հետ կապված, դրա համար ել սկսել են բաց գործել»: Այսօր ոստիկանությունը հայտրարություն է տարածել, որ «Շուրջօրյա հավաքի» մասնակիցներն օգտագործում են ոգելից խմիչքներ. «2016 թ. հունվարի լույս 27-ի գիշերը, ժամը 1.15-ին, ոստիկանության Կենտրոնականի բաժին հեռախոսային ահազանգով դիմած քաղաքացի Թինա Ն. -ն հայտնել է, որ Ազատության հրապարակում, Թումանյանի արձանի մոտ տեղադրված վրանում, մի խումբ անձինք օգտագործում են ոգելից խմիչքներ և բարձրաձայն հայհոյում: ՀՀ ոստիկանությունը միջոցներ է ձեռնարկել ահազանգով ստացված տեղեկությունները ստուգելու նպատակով: Վարչական զննությամբ պարզվել է, որ «շուրջօրյա հավաքի» մասնակիցները հասարակական վայրում օգտագործում են ոգելից խմիչքներ»,-ասված է ոստիկանության տարածած հաղորդագրության մեջ: Այս առնչությամբ Ղուկասյանն ասաց «Նոր Հայաստան»-ի 3 անդամ հերթապահություն են ունեցել, բոլորը եղել են սթափ, ինչն ապացուցվել է ոստիկանությունում: Ոստիկանության արածը փորձ էր խոչընդոտելու նստացույցը՝ գույքի առգրավման միջոցով: Որպեսզի գործողությունն արդարացվեր, որպես հնարք ներկայացրել են հասարակական կարգի խախտումը»,- ասաց նա: