Ինչ որ բա՞ն է սպասվում. Ադրբեջանում անակնկալի են եկել. Lragir.am

ՀՀ ԱԳ նախարար Էդվարդ Նալբանդյանը Մոսկվայում ՌԴ ԱԳ նախարար Լավրովի հետ քննարկել է Ղարաբաղի խնդիրը: Հանդիպումից հետո Լավրովը հայտարարել է, որ Մինսկի խմբին այլընտրանք չկա: Դա նշանակում է, որ համենայնդեպս այս փուլում խնդիրը չի տեղափոխվի Հայաստան-Ռուսաստան-Ադրբեջան եռակողմ ձեւաչափ, ինչի մասին խոսում էին Մոսկվան եւ Բաքուն, եւ ինչի փորձն արվեց Վիեննայից հետո, Սանկտ Պետերբուրգում:

Միջազգային շահագրգիռ կողմերը դեմ են այդ ձեւաչափին, մնում էր, որ Հայաստանը դիմադրեր, ինչը կարծես թե տեղի է ունեցել:

Եռակողմ ձեւաչափին վերադառնալու մասին խոսել էր Ադրբեջանի ԱԳ նախարարը, Նալբանդյանը հայտարարել էր, որ իրեն հայտնի չէ նման առաջարկ: Մինչ մոսկովյան հանդիպումը Ադրբեջանը լարել էր իրավիճակը շփման գծում, փորձելով նաեւ այդ կերպ հայկական կողմին հարկադրել հանդիպմանը:

Սակայն վերջին շրջանում կարծես թե փոխվել է հայկական բանակի առաջապահ ստորաբաժանումների մարտավարությունը, եւ կարծես թե ավելի ու ավելի հաճախ են դարձել պատասխան գործողությունների մասին հաղորդագրությունները: Բանակն այդպիսով բացառել է իր մասով ճնշումը: Հատկանշական է, որ Մոսկվա մեկնելուց առաջ Նալբանդյանն այցելել էր պաշտպանության նախարարություն:

Միեւնույն ժամանակ, հետաքրքիր է, որ այդ այցից առաջ թե Նալբանդյանը, թե Վիգեն Սարգսյանը ծավալուն հարցազրույցներ էին տվել ռուսական ԶԼՄ-ներին, որոնցում հավատարմություն էր հայտնվում պրո-ռուսական նախագծերին ու հավաստիացվում, որ Հայաստանը չի անի քայլեր, որոնք հակասում են Ռուսաստանի հետ պայմանավորվածություններին: Դա թերեւս եռակողմ ձեւաչափը մերժելու «գինն» էր»:

Թեեւ, պետք է նշել, որ Նալբանդյանը հիշատակել է ռուսական զենքի մատակարարումներն Ադրբեջանին, իսկ Վիգեն Սարգսյանն ասել էր, որ Հայաստանը կարող է «դիվերսիֆիկացնել» ռազմական համագործակցությունը:

Վիգեն Սարգսյանը նաեւ խոսել էր Իսկանդերի մասին՝ հավաստիացնելով, որ այն հայկական ուժերի տրամադրության տակ է, եւ պարզաբանել, թե որ դեպքում է այն կրակելու:

Այս ամենը հիմք է տալիս եզրակացնելու, որ հայկական կողմն ինչ որ անհանգստություն ու սպասումներ ունի, թերեւս եռակողմ հանդիպումը մերժելու կապակցությամբ: Այդ մասին խոսել էր նաեւ Սերժ Սարգսյանը ՊՆ-ում, չբացառելով ադրբեջանական նոր սադրանքը:

Այսօր տեղեկություն եղավ, որ ադրբեջանական զինուժի ղեկավարությունն այցելել է մերձճակատային գոտի եւ կոշտ գործողությունների հրահանգ տվել իր ստորաբաժանումներին: Ըստ ամենայնի, Ադրբեջանում անակնկալ է եղել հայկական բանակի մարտավարության փոփոխությունն առաջնագծում: