Ինքնասպան են լինում ուժե՞ղ, թե՞ թույլ մարդիկ․ մեկնաբանություններ ու խորհուրդներ հոգեբանի կողմից

Վերջին ժամանակներս ԶԼՄ-ներում հաճախակի են հայտնվում են հրապարակումներ՝ ինքնասպանությունների մասին: Մարդիկ այս կամ այն պատճառով որոշում են վերջ տալ իրենց կյանքին:

Օրերս տեղի ունեցավ աննաղադեպ մի երևույթ. Լոռու մարզում 22-ամյա երիտասարդը «Ֆեյսբուք» սոցիալական ցանցում ուղիղ եթերում հայտարարել էր, որ մտադիր է ինքնասպանություն գործել: Բարեբախտաբար, մտերիմները դիմել էին իրավապահ մարմիններին, և դժբախտություն տեղի չէր ունեցել:

Անդրադառնալով վերոնշյալ թեմային՝ հոգեբան Սամվել Խուդոյանը Fnews.am-իթղթակցի հետ զրույցում նշեց. «Այո՛, գրեթե ամեն շաբաթ ինքնասպանությունների մասին լուրեր կարդալը կարծես թե արդեն ստանդարտ երևույթ է դարձել: Բնականաբար, մեր ժամանակներում նման դեպքերը, բաց, ազատ ներկայացնում են, բայց չի կարելի ասել, թե այս շրջանում ճգնաժամային իրավիճակ է և, որ ինքնասպանությունների թվի աճ է նկատվում»:

Հոգեբանը հիշեցրեց՝ կան մարդիկ, ովքեր ինքնասպանության փորձ են անում, բայց հետո, բարեբախտաբար դա կանխվում է: Իսկ երբ տվյալ դեպքը հրապարակվում է ԶԼՄ-ի միջոցով, ինքնասպանության փորձ կատարած անձը, բնականաբար, ճնշվում է այդ երևույթից:
«Այդ մարդու շրջապատը տվյալ դեպքից հետո այլ կերպ կարող է նայել նրան: Ավելին, այդ դեպքի պատճառով նման մարդկանց երբեմն նույնիսկ գործատուներն են հրաժարվում աշխատանքի ընդունել: Այո՛, իհարկե, լավ չէ, որ դա լուսաբանվում է, բայց մյուս կողմից էլ կարելի է ասել, որ լրագրողներն էլ իրենց գործն են արել:

Սովորաբար, ինքնասպանությունը գործում են հուզական ոչ կայուն վիճակում: Մարդը հուզական ծանր վիճակում է լինում. չի կարելի ասել՝  թույլ է: Ինքնասպանություն գործելու պահին մարդու մոտ բացակայում է մտածողությունը, քննադատական միտքը. Նա չի կարողանում հստակ կշռադսատել, հասկանալ՝ ինչու է նման քայլի դիմում: Եթե մարդը սթափ մտածի, նման խնդրի առաջ չի կանգնի:

Ի վերջո, «վստահության հեռախոս» գոյություն ունի կամ կարելի է դիմել հոգեբանի: Այնպես որ, տվյալ դեպքում մարդը հոգեբանական օգնության կարիք է ունենում: Եթե նրան սթափեցնեն, նա այլևս չի ձգտի ինքնասպանության: Այսինքն՝ այստեղ հուզական վիճակն է որոշիչ դեր խաղում, ոչ թե մարդու անհատական առանձնահատկությունը, ստացվում է՝ չի կարելի ասել՝ նա թույլ էր կամ ուժեղ, որ նման քայլի դիմեց»,- եզրափակեց հոգեբանը՝ հավելելով՝ եթե մարդը զգում է, որ նման իրավիճակում է հայտնվել ու ինքնասպանությունն է որպես ելք դիտարկում, վատագույնին չհանգելու համար հարկավոր է ճիշտ ժամանակին կշռադատել ամեն ինչ ու դիմել մասնագետներին:

Հիշեցնենք՝ ԱԻՆ-ում գործում է նաև անվճար հոգեբանական ծառայություն, որտեղ մասնագետները պատրաստ են օրվա բոլոր ժամերին օժանդակել քաղաքացիներին՝ պատասխանել զանգերին, զրուցել նրանց հետ, լսել ու մասնագիտական խորհրդատվություն տրամադրել: Ծառայությունը հիմնվում է գաղտնապահության, անանունության, մարդասիրության, անշահախնդրության, հանդուրժողականության, մարդու ազատության հիմնարար սկզբունքների վրա: