Իրավապաշտպան․Ախտորոշման ի հայտ գալը «օգտագործվելու է հօգուտ Տիգրան Խաչատրյանի»

«Տիգրան Սուրիկի Խաչատրյանը 2013 թ. ձմեռային զորակոչի ընթացքում 13.01.2014թ. ներկայացել է Կենտրոնական բժշկական հանձնաժողովի նիստին: Համաձայն բժիշկ-փորձագետների զննման և տրված ակտի` նրա մոտ ախտորոշվել է «նևրասթենիա, ասթենո-նևրոտիկ վիճակ» և, համաձայն ՀՀ ՊՆ 410-13 հրամանի 5-րդ հոդվածի «գ» կետի պահանջների, տրվել է տարկետում 6 ամիս ժամկետով: 24.07.2014 թ. Տիգրան Սուրիկի Խաչատրյանը ներկայացել է Կենտրոնական բժշկական հանձնաժողովի նիստին, զննվել է բժիշկ-փորձագետների կողմից: Նրա մոտ ախտորոշվել է «նևրասթենիա չափավոր արտահայտված» և, համաձայն ՀՀ ՊՆ 410-13 հրամանի 7-րդ հոդվածի «բ» կետի պահանջների, ճանաչվել է «ժամանակավորապես ոչ պիտանի զինվորական ծառայությանը խաղաղ ժամանակ» և տրվել է տարկետում 3 տարի ժամկետով»,-ասված է «Ազատության» հարցմանն ի պատասխան ստացված պաշտոնական արձագանքում:

Սյունիքի մարզպետի որդին մեղադրվում է Գորիսի «Սդղի գյոլ» կոչվող վայրում մայիսի 2-ին Հարություն Զաքարյանին ծանր մարմնական վնասվածք հասցնելու համար, ինչի հետևանքով երիտասարդի աչքը կուրացել է: Տիգրան Խաչատրյանը կալանավորված է:

Երկու տարի առաջ Սյունիքի մարզպետի գորիսյան առանձնատան մոտ տեղի ունեցած սպանության գործով ևս շոշափվում է Տիգրան Խաչատրյանի անունը: 2013-ի ամռանը իրավապահները նրան մեղադրանք առաջադրեցին սպանության համար: Բուդաղյանների ընտանիքը, նրանց փաստաբան Հայկ Ալումյանը պնդում են, թե Ավետիք Բուդաղյանին հասցված հրազենային մահացու վնասվածքներից առնվազն երկուսի հեղինակը հենց Տիգրան Խաչատրյանն է, նաև մարզպետի որդին է հրազենային ծանր մարմնական վնասվածքներ հասցրել սպանվածի եղբորը՝ Արտակ Բուդաղյանին: Սակայն նույն թվականի սեպտեմբերին Տիգրանի նկատմամբ քրեական հետապնդումը դադարեցվեց, քանի որ իրավապահները գտան, որ նման կերպ մարզպետի որդին ինքնապաշտպանվել է:

«Ազատության» հետ զրույցում իրավապաշտպան Ժաննա Ալեքսանյանը համոզմունք հայտնեց, որ նման ախտորոշման ի հայտ գալը օգտագործվելու է հօգուտ Տիգրան Խաչատրյանի, ով պարբերաբար հանդես է գալիս տարբեր «արյունալի պատմությունների հերոսի» դերում․ - «Ես չեմ տեսնում այն իրավիճակը, որ կարող է նրա որդուն դատապարտեն, պատժեն: Կամ Սուրիկ Խաչատրյանին: Հիմա մի քիչ հաշվի են նստում հանրային կարծիքի հետ, և մի քիչ զգույշ են այդ քայլերը, ուղղակի չեն ձևակերպում ինքնապաշտպանություն, ինչպես Բուդաղյանների այդ արյունալի միջադեպի ժամանակ, բայց չեմ կարծում, որ Պաշտպանության նախարարությունը հենց այնպես է սա հանել: Կարծում եմ, որ իր վերջո կօգտագործվի որպես պաշտպանություն Տիգրան Խաչատրյանի»:

մանրամասն՝ այստեղ: