Ջրծաղիկի գործով 2 տարի ձգձգվող դատաքննությունն ավարտվեց

2011թ. բանակում զինծառայող Հայկ Խաչատրյանի՝ ջրծաղիկից մահանալու գործով դատաքննությունը վերջապես ավարտվել է:

«Փաստինֆո»-ի թղթակցի հետ զրույցում ամբաստանյալ Միքայել Միքայելյանի պաշտպան Լևոն Պողոսյանը նշեց, որ դատարանը, վերջին դատական նիստում որոշել է մի քանի դատական նիստերին պատշաճ կարգով ծանուցված, սակայն դատարան չներկայացած տուժողի իրավահաջորդին և ներկայացուցչին գրությամբ տեղեկացնել դատաքննության ավարտի մասին և եթե միջնորդություններ ունեն, ապա ներկայացնեն:

2012թ. օգոստոս ամսից քննվող այս գործով մի քանի փորձաքննություն է նշանակվել, մինչև անգամ դատարանում հարցաքննվել են փորձագետները և պնդել, որ մահացած զինծառայող Հայկ Խաչատրյանի մոտ եղել է ջրծաղիկի վիսցերալ ձևը և եթե զինծառայողը ստանար հակավիրուսային դեղորայքի ներարկում, ապա հնարավոր չէր լինի կանխել ջրծաղիկի վիսցերալ կայծակնային ձևի զարգացումը: Մահվան ելքը, ըստ նրանց, ջրծաղիկի վիսցերալ ձևի ժամանակ անխուսափելի է:

Այս գործի շրջանակներում հարցաքննվել է նաև հանրապետության գլխավոր վարակաբան Արա Ասոյանը, ով ևս նշեր էր, որ եթե հիվանդի մոտ զարգանում է ջրծաղիկի վիսցերալ ձևը, ապա այն բուժել հնարավոր չէ:

Ըստ փորձագետների՝ ամբաստանյալների գործողությունները որևէ պատճառահետևանքային կապի մեջ չեն գտնվում զինծառայող Հայկ Խաչատրյանի մահվան հետ:

Մասնավորապես, ըստ փորձագետների եզրակացության՝ Ջրծաղիկի ախտորոշվելուց հետո տեղափոխման համար անհրաժեշտ բոլոր միջոցառումները կազմակերպվել են, սակայն նոր աշխատանիշներ ի հայտ գալուց հետո՝ սուր ցավեր որովայնում, որոշվել է թողնել հիվանդին հոսպիտալում՝ վիրաբույժի հսկողության տակ, քանի որ հոսպիտալը հանդիսանում է բազմապրոֆիլ հիվանդանոցային համալիր, իսկ «Նորքի ինֆեկցիոն հիվանդանոցը»՝ մոնոպրոֆիլ:

Սակայն պաշտպանական կողմը գտնում է, որ եթե զինծառայողը շուտ տեղափոխվեր «Նորքի ինֆեկցիոն հիվանդանոց, ապա հնարավոր կլիներ զինծառայողին օգնել:

Հաջորդ դատական նիստում դատարանը կանցնի դատական վիճաբանությունների փուլին: