Կանխազգալով վտանգը՝ Արգամիչը զգուշանում է

Հովիկ Աբրահամյանի՝ ՀՀԿ-ից դուրս գալու եւ քաղաքականության մեջ մնալու հայտարարությունից հետո մենք պարբերաբար լուրեր ենք ստանում, որ նրա բիզնեսներում ստուգումներ են սկսել կամ սկսելու։ Տեղեկացանք, որ օրերս հարկային մարմինները այց են կատարել Արգամիչի ընտանիքին պատկանող գազալցակայաններից մեկը՝ ստուգումներ անելու եւ արդյունքում՝ տուգանելու նպատակով, սակայն լուրջ խախտումներ չի հաջողվել գտնել։ Նախկին վարչապետի հայտարարությունից հետո Արտաշատում գտնվող նրա առեւտրի կենտրոնում էլ կանչել են բոլոր առեւտրականներին եւ հրահանգել, որ պարտադիր բոլորը գրանցվեն օրինական դաշտում, մինչ այդ նրանք աշխատել են ստվերում։ Մյուս օբյեկտներում էլ սկսել են անգամ ՀԴՄ տպել։  Այժմ փաստորեն կանխազգալով վտանգը՝ Արգամիչը կանխավ քայլեր է ձեռնարկում։ Հավելենք, որ Աբրահամյանի հեռանալուց հետո նա կորցնում է իր հենարանները թե ուժային, թե հարկային մարմիններում։ Արմավիրի ոստիկանապետ եղբորորդին ազատվել է աշխատանքից, նույնը կարող է սպառնալ հարկայինում աշխատող նրա մյուս հարազատներին։ Ինչպես հայտնի է, Աբրահամյանի նոտար դստեր ամուսինը՝ Վահան Մամիկոնյանը ՊԵԿ օպերատիվ հետախուզության վարչության պետի տեղակալն է, վերջինիս եղբայրը՝ Վարդան Մամիկոնյանը, Արտաշատի հարկային տեսչությունից տեղափոխվել է Աշտարակ։ Հովիկ Աբրահամյանի մյուս փեսան՝ Վլադիմիր Թամրազյանը, «Զվարթնոց» մաքսատան պետն է: 

Hraparak.am