Կառավարությունը բացատրություն կտա՞, թե ինչու չի կարողացել ապահովել խոստացած եկամուտները

1IN.AM-ը գրում է.

Երեկ վերջապես պետեկամուտների կոմիտեն հրապարակեց հոկտեմբեր ամսվա հարկային եկամուտների հավաքագրման ցուցանիշները: Նախ նշենք, որ այս անգամ այդ ցուցանիշները բավականին ուշ հրապարակվեցին, նախորդ դեպքերում դրանք հրապարակվում էին ամսվա առաջին տասնօրյակում: Իսկ ցուցանիշներն առանձնապես ուրախանալու տեղիք չեն տալիս:

Ճիշտ է, սրանք անցած տարվա հոկտեմբերի համեմատ 6․6 տոկոս աճ են գրանցել, և միայն անցած ամսին հավաքագրվել է 100․4 մլրդ դրամ: Իսկ անցած 10 ամսվա ընթացքում հավաքվել է 935․6 մլրդ դրամ: Բայց երբ դիտարկում ենք հավաքագրումների տեմպը, տեսնում ենք, որ այն այդպես էլ միջին ամսական կտրվածքով 100 մլրդ դրամը չկարողացավ հատել՝ 93․5 մլրդ դրամ է: Հիշեցնենք, որ 2017թ. բյուջեով նախատեսված է հավաքել 1 տրլն 135 մլրդ դրամ, և մինչև տարեվերջ դեռ պետք է հավաքվի 209․6 մլրդ դրամ: Այսինքն նոյեմբեր-դեկտեմբեր ամիսներին պետք է հավաքագրեն 105 մլրդ դրամ, որ բյուջեն չթերակատարվի: Կհաջողվի՞ ՊԵԿ-ին յուրաքանչյուր ամիս հավելյալ 5 մլրդ դրամ հավաքել: Դա շատ բարդ է, և անգամ 1 մլրդ դրամն է խնդիր դառնում: Ճիշտ է, տարեվերջին, հատկապես ամանորյա գնումների արդյունքում հնարավոր է ավելանան հարկային մուտքերը, բայց նախորդ տարիների տվյալները ցույց են տալիս, որ դրանք ընդամենը 1-2 և ոչ թե 5 մլրդ դրամով են ավելանում: Եթե հաշվի առնենք նաև այն հանգամանքը, որ վերջին ամսին տնտեսական աճն էլ դանդաղել է: Եվ այն մտահոգությունը, թե այս տարի բյուջեի եկամտային մասը կարող է թերակատարվել, դեռ պահպանվում է: ՊԵԿ-ն առայժմ մի կերպ է հասնում բյուջեով նախատեսված ցուցանիշի հետևից:

Առավել մանրամասն՝  1IN.AM