Կցուցադրվի «Անվերջ փախուստ, հավերժ վերադարձ» հեղինակային կինոշարքի առաջին ֆիլմը

Նոյեմբերի 7-ին, ժամը` 18:00-ին, Մոսկվա կինոթատրոնի Կապույտ դահլիճում տեղի կունենա Հարություն Խաչատրյանի «Անվերջ փախուստ, հավերժ վերադարձ» հեղինակային կինոշարքի առաջին ֆիլմի` «Հայկ.փախուստի» ցուցադրությունը: Կինոռեժիսոր Հարություն Խաչատրյանին տարիներ շարունակ հետաքրքրել է այն մարդկանց ճակատագիրն ու կենսակերպը, որոնք տարբեր պատճառներով լքել են հայրենիքը կամ ընդհակառակը, ծնվելով եւ կյանքի զգալի մասն ապրելով տարբեր երկրներում, հետ են վերադարձել Հայաստան: «Անվերջ փախուստ, հավերժ վերադարձ» ֆիլմաշարը նվիրված է այսօրվա Հայաստանի ամենացավոտ խնդրին՝ արտագաղթին: Յուրաքանչյուր ֆիլմում պատմվում է մի հերոսի մասին՝ թատերական ռեժիսորի, ինժեների, նկարչի, դերասանի, երգահանի… «Հայկ. փախուստ» Ֆիլմի նյութը ընդգրկում է 1987-ից մինչեւ մեր օրերը նկարահանված տեսանյութեր: Ֆիլմի պատումը թատրոնի ռեիսոր Հայկի մասին է. նրա նախաձեռնությունների, ձեռքբերումների, պայքարի ու անվերջ ձգվող փնտրտուքների: Թվում է` 20 տարիների ընթացքում նրա խնդիրները չեն լուծվել. նրա հակասություններով լի խոսքը գրեթե չի փոխվել.... Ֆիլմն այս տարի Հայակ ազգային կինոմրցանակաբաշխությունում արժանացավ «Լավագույն վավերագրական ֆիլմ» եւ «Լավագույն ռեժիսոր» անվանակարգերի գլխավոր մրցանակներին: Մուտքը հրավիրատոմսով է, որը կարելի է ձեռք բերել Մոսկվա կինոթատրոնում, ցուցադրությունից 30 րոպե առաջ: