ԿՈՉ ՀԱՅԱՍՏԱՆԻ ԲՈԼՈՐ ՁԱԽԱԿՈՂՄՅԱՆ ՈՒԺԵՐԻՆ ՈՒՄ ԵՔ ՊԵՏՔ ԸՆԿԵՐ ԿՈՄՈՒՆԻՍՏՆԵՐ

Հեռացեք Ձեր պաշտոններից և զիջեք Ձեր տեղն ավելի համարձակներին և գործունյաներին
Ես, Կարեն Վարդանյանս, լինելով սոցիալիստ, խիստ դատապարտում եմ Հայաստանում ստեղծված քաոսային իրավիճակում սոցիալիստներիս կողմից ցուցաբերվող կեցվածքը, մասնավորապես, հանցավոր պասիվությունն ու չկամությունը: Մենք մեր անգործությամբ կամա թե ակամա նպաստում ենք մեր ժողովրդի հարստահարման շարունակականությանը, երկրի հայաթափմանը: Խոսքս ուղղում եմ մասնավորապես ՀԿԿ Կենտկոմի առաջին քարտուղար Տաճատ Սարգսյանին, Հայաստանի առաջադիմական միացյալ կոմունիստական կուսակցության Կենտկոմի առաջին քարտուղար Վազգեն Սաֆարյանին և իրենց ձախ գաղափարների կրող համարող քաղաքական ուժերին: Ո՞ւմ եք պետք, եթե Ձեր աչքի առաջ ոտնահարվում են աշխատավորների իրավունքները, քաղաքացիների սոցիալական իրավունքները, եթե մարդկանց վաստակածը փոշիանում է հաշված ժամերի ընթացքում և ո՞ւմ եք պետք, եթե այս օրերին իշխանության մտքով չի անցնում հաշվի նստել Ձեզ հետ, երբ իշխանություններն իրենց թիկունքում չեն զգում ձախ ուժերի մշտարթուն շունչը: Ո՞ւմ եք պետք, եթե երկրի անապահովներն իրենց հուզող խնդիրերով դիմելու համար ճիշտ հասցեն փնտրելիս Կենտկոմի և մյուս ձախ ուժերի գրասենյակների հասցեները չեն հիշում, փոխարենը նախընտրում են գնալ կապիտալիստների դուռը՝ ողորմության ակնկալիքով:

Միայն մայիսի 1-ից մայիսի 1 սեփական գոյության մասին հիշեցնելով կոմունիստ կամ սոցիալիստ չեն դառնում: Եվ առհասարակ, եկել է պահը, որ ասենք՝ դուք Ձեր անգործությամբ ավելի մեծ նվեր եք մատուցում իշխանություններին և կապիտալիստներին, քան բոլոր տեսակի քրեածին տարրերը, թաղային հեղինակությունները և դոլարի փոխարժեքի տատանումները: Միգուցե ժամանակն է եկել, որ չալարեք, ուսումնասիրեք արդի քաղաքական պատմությունը և տեսնեք, որ դժվար թե գտնվի մեկ այլ աղքատ երկիր, ուր ձախ ուժերը լինեն այսքան ոչ ազդեցիկ և ինչո՞ւ չէ, ժողովրդի կողմից մոռացված: Եթե դուք ի վիճակի չեք ըստ արժանվույն Հայաստանում ազդեցիկ դարձնել ձախ գաղափարները, ապա անմիջապես հեռացեք Ձեր պաշտոններից և զիջեք Ձեր տեղն ավելի համարձակներին և գործունյաներին: Սա է Հայաստանում ձախ գաղափարների վերակենդանացման միակ ճանապարհը:

Կարեն  Վարդանյան