Կոտայքի մարզում «Գազ 31»-ը մխրճվել է բեռնատար «Զիլ»-ի մեջ. կան վիրավորներ

Shamshyan.com-ը գրել է. Երեկ՝ հուլիսի 24-ին, ավտովթար է տեղի ունեցել Կոտայքի մարզում: Ժամը 19:30-ի սահմաններում Գազ 3110 մակնիշի 50 NՏ 101 համարանիշի ավտոմեքենայի վարորդը Երևան-Սևան ավտոճանապարհի 43-րդ կմ հատվածում դեպի Երևան ընթանալիս բախվել է ՌԴ Ռոստովի մարզի բնակիչ, 45-ամյա Օլեգ Ուստիանսկիի վարած Daweoo մակնիշի K 955 PR 161 համարանիշի բեռնատար ավտոմեքենայի հետնամասին: Ինչպես հայտնում է ֆոտոլրագրող Գագիկ Շամշյանը, վթարի հետևանքով Գազ 3110-ի մեջ գտնվող Երևան քաղաքի Սարի թաղի բնակիչներ, 30-ամյա Նշան Պապիկյանը և 30-ամյա Հովհաննես Մուրադյանը մարմնական վնասվածքներով տեղափոխվել են Հրազդանի բժշկական կենտրոն: Վթարի վայր են ժամանել Ճանապարհային ոստիկանության 2-րդ սպայական գումարտակի 3-րդ վաշտի 2-րդ դասակի աշխատակիցները՝ վաշտի հրամանատար Արթուր Պետրոսյանի և դասակի հրամանատար Կարեն Ներսիսյանի գլխավորությամբ: Վիրավորներին ավտոմեքենայից դուրս են բերել քաղաքացիները, ինչպես նաև այդ պահին նշված հատվածով անցնող Ոստիկանության պահպանության բաժնի Սևանի պահպանության բաժնի պետ Արթուր Գևորգյանը: Փաստի առթիվ Հայաստանի քննչական կոմիտեի Կոտայքի մարզային քննչական վարչությունում նյութեր են նախապատրաստվում: Ոստիկանությունն ու քննչական բաժինը պարզում են վարորդի ինքնությունը: Գ. Շամշյանի տեղեկություններով՝ բեռնատարը հաշվառված է ՌԴ Դոնի Ռոստովի «Դոմ» ավտոսերվիսում: