Լեւոն Հայրապետյանը կվերադառնա Ղարաբաղ, հենց վերացվի Մոսկվայից դուրս գալու արգելքը

Հայազգի գործարար Լեւոն Հայրապետյանը չի կարող հեռանալ Մոսկվայից եւ Մոսկվայի մարզից, քանի դեռ իր դեմ հարուցված քրեական գործը չի կասեցվել։

«Երկու ամիս ես մնացի բանտարկյալի վիճակի մեջ, հիվանդանոցում։ Ինձ բաց թողեցին, ոչ մի բան չգտան, հիմա ես ազատ եմ, մենակ իրավունք չունեմ Մոսկվայից գնալու եւ Մոսկվայի մարզից։ Ինձ բռնել են նրա համար, որ ես օգնել եմ ծախել «Բաշնեֆտ»-ը, իսկ օգնությունը հանցագործություն չէ։ Ճիշտն ասած, ես չեմ օգնել, ես դեմ էի», - «Ազատություն» ռադիոկայանին տված հարցազրույցում ասել է Հայրապետյանը։

Գործարարը նշեց, որ հենց վերացվի Մոսկվայից դուրս գալու արգելքը, ինքը կմեկնի Ղարաբաղ։ «Որ մենակ մեր գյուղը չաճի... կողքի գյուղերը, շրջանը Մարտակերտի եւ ամբողջ Ղարաբաղը», - ասաց Հայրապետյանը։

Հարցին, թե կարո՞ղ է պատկերացնել, որ Ադրբեջանին հանձնվեն այդ շրջանները, հայազգի գործարարը պատասխանեց. - «Ես չեմ կարող տենց բան պատկերացնել։ Եթե, օրինակ, ինձ ասեն՝ կա՛մ կյանքդ է, որ ողջ պետք է մնաս, կա՛մ Ղարաբաղը հանձնես, ես Ղարաբաղը կընտրեմ։ Ես համոզված եմ, որ մեր իշխանություններն էլ են այդպես կարծում՝ ես Ղարաբաղի ղեկավարության մասին եմ խոսում, իրենք շատ մեծ պատրիոտ են իրենց հողի»։

Հարցին, որ եթե Հայաստանի իշխանությունները ստիպեն, Ղարաբաղի իշխանությունները կըմբոստանա՞ն Հայաստանի իշխանությունների դեմ, գործարարը պատասխանեց. - «Չեն կարող ստիպել իրենց։ Իսկ եթե պետք լինի՝ կըմբոստանան»։

Անդրադառնալով Ռուսաստանի հայերի միության նախագահ Արա Աբրահամյանի՝ հայաստանյան քաղաքական դաշտ մտնելու որոշմանը, Լեւոն Հայրապետյանն ասաց, որ դրական է վերաբերվում դրան։ «Ընդհանրապես սփյուռքը պետք է լայն ներկայացված լինի հայաստանյան քաղաքական համակարգում, քանի որ նաեւ արտերկրից եկող տրանսֆերտների հաշվին է այսօր ապրում Հայաստանը։ Աբրահամյանը կարող է հաջողության հասնել Հայաստանում», - ասաց Հայրապետյանը։