Լուրջ տրանսֆորմացիաներ ԼՂ խնդրի շուրջ

ԵԱՀԿ Մինսկի խմբի ամերիկացի համանախագահ Ջեյմս Ուորլիքը երեկ գրառում է արել Վաշինգտոնում ԵԱՀԿ Մինսկի խմբի համանախագահների հավաքի և ԱՄՆ երեք կարևոր գերատեսչություններում հանդիպումների մասին: Ըստ Ուորլիքի՝ Մինսկի խմբի երեք համանախագահները ԱՄՆ-ում հանդիպում և քննարկումներ են ունենալու պետքարտուղարությունում, պաշտպանության նախարարությունում և ազգային անվտանգության նախարարությունում:

Բնականաբար, խոսքը Լեռնային Ղարաբաղի հակամարտության կարգավորման շուրջ քննարկումների մասին է: Ինչ վերաբերում է բովանդակությանը, ապա Ուորլիքը քննարկումների որևէ կոնկրետ ուղղություն կամ նպատակ չի նշում: Սակայն ինքնին այն ներկայացուցչականությունը, որ առկա է նրա մատնանշած հաստատությունների մասով, արդեն իսկ բավական խոսուն է:

Կարծեք թե չկան նախադեպեր, երբ Մինսկի խմբի համանախագահները նմանօրինակ հանդիպումներ ունենան գործադիր իշխանության կարևորագույն հաստատություններում: Թե ինչի վկայություն կարող է լինել սա՝ շատ դժվար է ասել: Բայց այս ֆորմատը արդեն իսկ նոր է ինքն իրենով, և հետաքրքիր կլինի հետևել, թե ինչ շարունակություն կունենա այն: Այսինքն՝ կլինե՞ն, օրինակ, հանդիպումներ Մոսկվայում կամ Փարիզում, թե՝ ոչ: Թե՞ ԱՄՆ-ը փորձում է նոր առաջարկներ ներկայացնել հակամարտության կարգավորման գործընթացի համար, ինչն էլ արվելու է Մինսկի խմբի համանախագահների հետ հանդիպումների միջոցով:

Հատկանշական է այն, որ նմանօրինակ նոր ֆորմատի հանդիպումը, նման մակարդակի ներկայացուցչական քննարկումները հաջորդում են Բաքվում եվրոպական օլիմպիական խաղերին: Այդ խաղերից հետո սպասվում էր Բաքվի ագրեսիվ քաղաքականության նոր բռնկում: Միևնույն ժամանակ էլ օրեր առաջ հայտնի դարձավ, որ Ռուսաստանն ու Հայաստանը վարկային համաձայնագիր են կնքում Մոսկվայից Երևանին «Իսկանդեր» օպերատիվ-տակտիկական զինատեսակի մատակարարման շուրջ, ինչը արդեն իսկ նշանակում է ոչ միայն լոկ սպառազինություն, այլ ռազմա-քաղաքական իրավիճակի որոշակի փոփոխություն:

Սրան զուգահեռ՝ ամերիկյան նմանօրինակ ներկայացուցչական քննարկումները չափազանց հետաքրքրական են նաև Միջազգային հարաբերությունների Բրիտանական Թագավորական ինստիտուտի (The Royal Institute of International Affairs) հայտնի Chatham House կենտրոնի հրավերի ֆոնին, որ ուղղել են ԼՂՀ նախագահ Բակո Սահակյանին: Սահակյանը հուլիսի 8-ին կմասնակցի Լոնդոնում կազմակերպված քննարկմանը: Հեղինակավոր կենտրոնի հրավերը, ըստ էության, նշանակում է ոչ պաշտոնական ճանաչում:

Ակնհայտ է, որ ԼՂ խնդրում հասունանում է բավական լայնածավալ մի տրանսֆորմացիա, որտեղ գլխավոր հարցը, իհարկե, հանգում է իրավիճակի կայունությանն ու խաղաղությանը: Իսկ հարցը կարող ենք ձևակերպել հետևյալ կերպ. նոր տրանսֆորմացիաների նպատակն է լինելու խաղաղությունն ու կայունությունը պահե՞լը, թե՞ ապակայունացումը կարող է հանդիսանալ նոր տրանսֆորմացիաները հեշտացնելու միջոց: Հայաստանն ու ԼՂՀ-ն պետք է ունենան հարցադրման երկու «ծայրերին» առնչվող բազմաթիվ աշխատանքային սցենարներ՝ յուրաքանչյուր պահի դրանցից որևէ մեկին արդյունավետ արձագանքելուն պատրաստ լինելու համար:

1in.am