Լույս է տեսել «Ագուլիսի 1919թ. ողբերգություն-եղեռնը» աշխատությունը

ՀՀ մշակույթի գործիչ հայագետ-նախիջևանագետ Արգամ Այվազյանն այսօր լրագրողների հետ հանդիպման ժամանակ ներկայացրեց իր օրերս լույս տեսած «Ագուլիսի 1919թ. ողբերգություն-եղեռնը» աշխատությունը: Ինչպես նշեց պարոն Այվազյանը, արևելյան Հայաստանում եղած եղեռնագործությունները քիչ են լուսաբանվել: «Այստեղ մանրամասն ներկայացված է, թե ինչ վայրագություններ են տեղի ունեցել` այն ինչ եղել է Արևմտյան Հայաստանում, եղել է Սումգայիթում, նույն բախտին էլ արժանացել են Գողթն գավառի սիրտը համարվող Ագուլիս քաղաքի բնակիչները 1919թ. դեկտեմբերի 24-25-ին»:

Գրքի հավելվածին կցված են նաև Ագուլիսի 1919-1920 թվականների 15 փաստաթղթեր և Նախիջևանի մի քանի բնակավայրերի փաստավավերագրական լուսանկարներ: «Եղեռնագործության նույն ձեռագիրն է, ինչպես Արևմտյան Հայաստանի չարագործություններն են հրաժավում ընդունել Թուրքերը, այնպես էլ այս դեպքում տեսնում ենք նույն միտումը: Հստակորեն ժամանակակիցներն ու դեպքերի մասնակիցներն են իրականացնում դեպքերի նկարագրությունները: Հուշագրողները պատահական մարդիկ չեն, նրանք բոլորն են կրթյալ մարդիկ են և հստակորեն պատմում ու ներկայացնում են ամենն ինչ կատարվել է: Սա պանթուրքիզմի ծրագրերից մեկն էր, որն էլ իրականացվեց: Մեր պատմագրությունը հավուր պատշաճի պետք է ներկայացնեն»,- ասաց Արգամ Այվազյանը: Բանախոսը նշեց, որ «Ագուլիսի 1919թ. ողբերգություն-եղեռն» աշխատության մեջ զետեղված են հատվածներ ծնունդով Ագուլեսցի Ադրբեջանի Ժողովրդական գրող Աքրամ Այլիսիի «Քարե երազներ» վեպ-ռեքվիեմից: ««Ագուլիսի 1919թ. ողբերգություն-եղեռն» աշխատությունը լույս է տեսել 300 օրինակ և արդեն կա գրախանութներում: Ցավալի է, բայց սրանք գրախանութներում վաճառվում են հինգ, տասը տարիների ընթացքում»,- մտահոգվեց բանախոսը: Հատորը լույս է տեսել «Վան» հասարակական կազմակերպության, Էդուարդ Ղազարյանի, Օնիկ Հարությունյանի և Հրայր Ոսկանյանի ներդրած միջոցներով: